२२ असोज, बझाङ ।

सडक निकासको माग राख्दै थलारा गाउँपालिका-६ सडिलका जेन-जीले तोडफोडसहित कार्यालयमा ताला लगाएका छन । युवाहरुले कर्मचारीलाई बाहिर निकाल्दै कार्यालयमा तोडफोडसहित तालाबन्दी गरेका हुन । झनाना सडिल तराटी ठिङाललेख सडकको माग गर्दै उनीहरु पालिका पुगेका थिए । उनीहरुले वडा नम्बर ६ को कार्यालयमा समेत तालाबन्दी गरेका थिए ।

गाउँपालिका ताला लगाउने सुचना पाए पनि ईलाका प्रहरी कार्यालयसँग पर्याप्त सुरक्षाकर्मी नहुँदा नियन्त्रण गर्न नसकेको प्रहरीले जनाएको छ । कार्यालयमा के कति क्षति भएको छ अहिले भन्न नसक्ने प्रमुख प्रशासकीय अधिकृत प्रयागराज पाध्याले बताए । सडिलका युवाहरुले आफ्नो माग पूरा गराउन शान्तिपूर्ण ढंगले गाउँपालिका र वडा पालिकामा ताला लगाईएको र माग पूरा नहुन्जेलसम्म ताला नखोल्ने बताएका छन् । झनाना सडिल तराटी ठिङाल्लेक सडक ठिङाल्लेकबाट कटिङ सुरु गरी पिखेत गाउँको मुङरा धारासम्म पुगेको छ ।

झनाना हुँदै पखेत गाउँसम्म पुगेको छ भने गाउँमा सहमति नजुट्दा करिव १५० मिटर सडक जोडिन बाकी रहेको छ । सडक जोड्न आर्थिक बर्ष २०८१र८२ मा १० लाख रुपैया बिनियोजन गरिएको थियो । सहमति जुटाउन थलारा गाउँपालिका अध्यक्ष प्रकाश रोकाया, उपाध्यक्ष रामबहादुर खाती, प्रमुख प्रशासकीय अधिकृत प्रयागराज पाध्या, वडा अध्यक्ष अनिल बिष्ट लगायत सरोकारवालाहरुले पहल गरे पनि सहमति नजुट्दा बजेट फ्रिज गएको थियो । पिखेतबाटमात्रै सडक आउनुपर्छ भन्ने हाम्रो मागछैन जहाबाट भए पनि सडिल गाउँ सडकसँग जोडिनुपर्छ भन्ने आफ्नो माग रहेको युवा देबी कडायतले बताए ।