४ असोज, वीरगन्ज ।

वीरगन्ज महानगरपालिकाले चालु आर्थिक वर्ष २०८२/८३ का लागि विनियोजन गरिएको बजेटलाई संशोधन गरी पुनःनिर्माणमा खर्च गर्ने निर्णय गरेको छ । शनिबार आयाेजित विशेष अधिवेशन (विशेष नगर सभा) ले पुननिर्माणसम्बन्धी प्रस्ताव सर्वसम्मतले पारित गरेको हो । गत भदौ २४ गते जेनजीले गरेको आन्दोलनका क्रममा अराजक समुहले महानगरपालिकाको कार्यालय भवनसहित सम्पूर्ण संरचना आगजनी, तोडफोड र लुटपाट गरेर ध्वस्त बनाएको थियो ।

महानगरको सम्पत्ति खरानी बनेपछि नगरवासीलाई सेवा प्रवाहमा निरन्तरता दिन पुननिर्माणलाई प्राथमिकतामा राख्नुपर्ने आवश्यकता औंल्याउँदै नगरसभाले चालु आर्थिक वर्षको बजेट संशोधन गरेर पुननिर्माण कार्यमा लगानी गर्ने निर्णय गरेको हाे। नगरसभामा महानगरका मेयर राजेशमान सिंहले संशोधित बजेट पेस गरेका थिए । यसअघि महानगरको १७ औं नगर परिषदले चालु आर्थिक वर्ष २०८२/८३ का लागि ३ अर्ब २२ करोड ४८ लाख ४९ हजार रुपैयाँको बजेट ल्याएको थियो ।उक्त बजेटभित्र नगरस्तरीय पूँजीगत योजना, सामाजिक विकास कार्यक्रम तथा वडा स्तरका योजनामा विनियोजन गरिएको रकमलाई पुनःनिर्माणतर्फ स्थानान्तरण गर्ने निर्णय शनिबारकाे १८ ओैं नगरसभाले गरेको हो । यसरी संशोधनपश्चात करिब ३० करोड रुपैयाँ पुनःनिर्माणका लागि उपलब्ध हुने भएको छ ।