मुग्लिन–नारायणगढ सडक खण्डमा पहिरो, करिब चार घण्टा यातायात अवरुद्ध

दुर्घटना समाचार प्रेस संवाददाता

मुग्लिन–नारायणगढ सडक खण्डमा पहिरो, करिब चार घण्टा यातायात अवरुद्ध

चितवन — मुग्लिन–नारायणगढ सडकखण्डको तुईन पुल नजिकै आज बिहान गएको पहिरोका कारण सडक करिब चार घण्टा अवरुद्ध भएको छ।

सडक डिभिजन भरतपुरका अनुसार बिहान ४ बजे माथिबाट ढुंगासहितको पहिरो खस्दा दुबै तर्फको सवारी आवागमन पूर्ण रूपमा रोकिएको थियो। घटनापछि डिभिजनले तत्काल दुईवटा मेकानिकल उपकरण परिचालन गरी पहिरो पन्छाउने कार्य सुरु गरेको थियो।

लगातार प्रयासपछि बिहान ८:१० बजेबाट सडक सञ्चालनमा आएको डिभिजनले जनाएको छ। डिभिजनका अधिकारीहरूका अनुसार वर्षायाममा सो क्षेत्रमा पहिरोको जोखिम उच्च हुने भएकाले यात्रु तथा सवारी चालकलाई सावधानीपूर्वक यात्रा गर्न आग्रह गरिएको छ।