१५ साउन, काठमाडौं ।

प्रधानमन्त्री केपी शर्मा ओलीले भक्तपुरको सूर्यविनायकमा ५० हजार दर्शक क्षमताको फुटबल रंगशाला बनाउने घोषणा गर्नुभएको छ । बिहीवार फिफा फुटबल फर स्कुल कार्यक्रमको उद्घाटन गर्नुहुँदै प्रधानमन्त्री ओलीले अब छिटै नै भक्तपुरको सूर्यविनायक नगरपालिकामा ५० हजार क्षमताको रंगशाला बनाउने घोषणा गर्नुभएको हो ।

दशरथ रंगशालाको क्षमता १५ हजार रहेको र नेपाली फुटबलप्रेमीहरुका लागि अब साँघुरो हुँदै गएकाले अब ठूलो नयाँ रंगशाला निर्माण कार्यमा सरकार जुटेको बताउनु भयो । दशरथ रंगशालालाई स्तरोन्नति गर्ने पनि प्रधानमन्त्रीको भनाइ छ । कीर्तिपुरमा क्रिकेट मैदानको स्तरोन्नति कार्य सम्पन्न हुने चरणमा रहेको पनि जानकारी दिनुभयो । अब खेल सिक्नको लागि खेल मैदानहरुको कमी नहुने पनि प्रतिवद्धता जनाउनु भयो । खेलकुद क्षेत्रका पूर्वाधार तयार सरकारले निर्माण गरिरहेको र महिला फुटबलरहरुका लागि अभ्यास गर्ने ठाउँहरुको निर्माण पनि गरिरहेको बताउनु भयो । प्रधानमन्त्री ओलीले भन्नुभयो, ‘हामी रंगशालाहरु निर्माण गरिरहेका छौँ । अब यो भन्दा दोब्बर दर्शकले हेर्नसक्ने क्षमता भएको रंगशाला निर्माण गर्ने काममा हामी लागेका छौँ ।

कीर्तिपुरमा क्रिकेट रंगशाला गत वर्ष निर्माण कार्य शुरु गरेका थियौँ । अहिले पूरा हुनै लागेको छ । अबको क्रिकेट खेलको सिजनमा हामी यही रंग्शालबाट खेलकुद अघि बढाउनेछौँ । यो रंगशाला ऐतिहासिक रंगशाला हो । यसलाई मर्मतसम्भार गर्नेगरी अघि बढाइएको छ । धनुषा र झापामा अन्तर्राष्ट्रिय स्तरको रंगशाला बनाउँदैछौँ । अब खेल सिक्नको लागि खेल मैदानहरुको कमी हुनेछैन । खेलकुद क्षेत्रका पूर्वाधार तयार गरिरहेका छौँ । महिला फुटबलका लागि अभ्यास गर्ने ठाउँ, रंगशाला हामी तयार गरिरहेका छौँ । अब छिटै नै हामी भक्तपुरको सूर्यविनायक नगरपालिकामा ५० हजार क्षमताको रंगशाला बनाउँछौँ । यो (दशरथ)रंगशाला भनेको १५ हजार दर्शक अटाउने रंगशाला हो । अब हामी भक्तपुरमा ५० हजार दर्शक क्षमताको रंगशाला बनाउने तयारीमा लागिरहेका छौँ ।’प्रधानमन्त्री ओलीले कीर्तिपुरस्थित क्रिकेट रंग्शालाको अधिकतम सदुपयोग हुने बताउनु भयो । भक्तपुरको जगातीमा ५० हजार दर्शक क्षमताको रंगशाला बनाउने घोषणा गर्नुभयो ।