३० असार, काठमाडौं ।

नेपाली कांग्रेसका महामन्त्री गगन थापाले न्यायलयको पुनर्संरचनाको आवश्यकता रहेको बताएका छन् । नेपाली कांग्रेसको पेशागत तथा बुद्धिजीवी विभागले सोमबार काठमाडौंमा राखेको कार्यक्रममा महामन्त्री थापाले न्यायपालिकालाई सफा बनाउन राष्ट्रिय बहस आवश्यक रहेको बताए । न्यायपालिकाप्रति धेरै प्रश्नहरू उठेको र नागरिकहरूको विश्वास र भरोसाका निम्ति नयाँ ढंगले सोच्नुपर्ने बेला आएको बताए । पुनर्संरचना गर्नका निम्ति आवश्यकता पर्दै गर्दा न्यायाधीशको पुनर्नियुक्ति गर्ने गरी जानुपर्ने उनले बताए ।

‘संविधान संशोधनको विषय चलिरहेको बेलामा एउटा महत्त्वपूर्ण विषयमा प्रवेश गर्नैपर्छ । त्यो भनेको न्यायपालिकाको पुनर्संरचनाको विषय हो,’ थापाले भने, ‘गोपालकृष्ण घिमिरे बारको अध्यक्ष हुँदै गर्दाखेरि एउटा अध्ययन र त्यसभित्र विवेचना गरेर राष्ट्रिय स्तरमा एउटा पोजिसन बनेको छ । बारको यो पोजिसनलाई नेपाली कांग्रेसले अन गर्नुपर्छ र न्यायालयको पूरा पुनर्संरचनाको बाटो जानुपर्छ,’ थापाले भने ।