सिंहदरबारभित्रै बाट हरायो सरकारी गाडी, खोजिदिन प्रहरीलाई पत्र

२० असार, काठमाडौं । 

देशको मुख्य प्रशासनीक केन्द्र सिंहदरबारभित्रै चोरी हुनु सामान्य होइन । त्यसमा पनि झोलामा राखेर लैजाने चिज नभइ गाडी नै हराएको विषय यतिबेला चर्चामा छ ।श्रम, रोजगार तथा सामाजिक सुरक्षा मन्त्रालयको गाडी सिंहदरबार भित्रैबाट हराएको हो । मन्त्रालयको स्वामित्वमा रहेको प्रदेश ३–०१–००२ झ ५३६७ नम्बरको महिन्द्रा स्कोर्पियो–एस फोर सरकारी गाडी सिंहदरबार परिसरबाट हराएको हो ।

मन्त्रालयबाटै गाडी हराएपछि उक्त गाडी खोजिदिन उसले प्रहरी प्रधान कार्यालय र उपत्यका ट्राफिक प्रहरी कार्यालय रामशाहपथ काठमाडौंलाई पत्र पठाएको छ । मन्त्रालयले असार १५ गते गाडी हराएको भन्दै सचिवस्तरीय निर्णय गरेर खोजीका लागि पत्राचार गरिएको हो । ‘यस मन्त्रालयको स्वामित्वमा रहेको तपसिलको विवरण अनुसारको चारपाङ्ग्रे सवारीसाधन विगत केही समय अघिदेखि हराइरहेको हुँदा उक्त सवारीसाधन जहाँ जस्तो जुन अवस्थामा छ, खोजतलास गरिदिनुहुन साथै प्रचलित कानुनबमोजिम सो कार्यमा संलग्न रहेका व्यक्तिलाई मुद्दा दर्ता गरी अनुसन्धान कारबाही अगाडि बढाइदिनुहुन असार १५

गतेको (नेपाल सरकार सचिवस्तर) निर्णय अनुसार अनुरोध गरिन्छ’ पत्रमा भनिएको छ । गृह मन्त्रालयका सहसचिवसमेत रहेका प्रवक्ता रामचन्द्र तिवारीले श्रम, रोजगार तथा सामाजिक सुरक्षा मन्त्रालयको गाडी खोजिदिन प्रहरीमा पत्र पठाइएको बताए । उनले यसबारे अहिलेसम्म प्रहरीबाट कुनै जानकारी प्राप्त नभएको जानकारी दिएका छन् । श्रम मन्त्री शरत्सिंह भण्डारीले भने हराएको भनिएको गाडी मन्त्रालयका सचिवको घरमै रहेको र गाडी प्राप्त भइसकेको दाबी गरेका छन् । मन्त्रीले भने गाडी हराएको नभइ केही व्यक्तिले स्टन्टबाजी गरेको आरोप लगाएका छन् ।