पूर्वराष्ट्रपति भण्डारीले भोलि सक्रिय राजनीतिमा ‘फर्किने घोषणा’ गर्ने !

१३ असार, काठमाडौं । 

शनिबार (भोलि) मदन भण्डारी फाउन्डेसनले काठमाडौंको राष्ट्रिय सभागृहमा ‘मदन भण्डारी स्मृति दिवस’ कार्यक्रमको आयोजना गरेको छ। उक्त कार्यक्रमलाई नेकपा (एमाले) को आन्तरिक पार्टी जीवनमा अर्थपूर्ण रूपमा हेरिँदैछ। कारण, मदन भण्डारीपत्नी तथा पूर्वराष्ट्रपति विद्यादेवी भण्डारीले सक्रिय राजनीतिमा फर्किने घोषणा गर्दैछिन्! एमालेका स्थायी समिति सदस्य कर्ण बहादुर थापाका अनुसार उक्त कार्यक्रममा भण्डारीले सक्रिय राजनीतिमा फर्किनेबारे बोल्ने गरी तयारी गरेकी छन्।

भण्डारीको तयारीबारे सोध्दा थापाले भने, ‘भोलि उहाँले एउटा स्पष्ट राजनीतिक सन्देश दिनुहुन्छ जस्तो लाग्छ मलाई। यो कुरा त्यति टाढा पनि छैन। भोलि उहाँले कुनै दुविधा नरहने गरी स्पष्ट पार्नुहुन्छ। त्यसैगरी तयारी गर्नुभएको छ।‘ थापाले भण्डारीले एमाले अध्यक्ष केपी शर्मा ओलीसँग भेटेर कुराकानी गरिसकेकाले पनि भोलि दुविधा नरहने गरी बोल्ने बताए। त्यसो त भण्डारी सक्रिय राजनीतिमा फर्किनु मात्रै त्यति चर्चाको विषय होइन तर, एमाले वृत्तमा चर्चा गर्नयोग्य विषय यो छ कि उनी सक्रिय राजनीतिमा फर्किएपछि पार्टी नेतृत्वमै पुग्ने गरी फर्किँदैछन्। यो चर्चा भण्डारी राष्ट्रपतिको पदबाट हटेसँगै सुरु भएको हो।

पछिल्लो समय यो झन्‌झन् ‘हट केक’ बन्दैछ। देशभित्र मदन भण्डारी फाउन्डेसनमार्फत राजनीतिक सक्रियता बढाएकी भण्डारीले पछिल्लो पटक छिमेकी देश चीनको भ्रमणसमेत गरिन्। उनी निकट नेताहरूले भण्डारीले चीनबाट नेतृत्व र कम्युनिष्ट एकताका लागि ‘सद्भाव’ लिएर फर्किएको बताउने गरेका छन्। यही पृष्ठभूमिमा भोलि आयोजित मदन भण्डारी स्मृति दिवस कार्यक्रमलाई महत्त्वपूर्ण र अर्थपूर्णमा हेरिएको छ। पछिल्लो पटक प्रधानमन्त्रीसमेत रहेका एमाले अध्यक्ष र भण्डारीबीच असार ५ गते साँझ भेटवार्ता भयो। उक्त भेटमा भण्डारीले ओलीलाई पार्टी नेतृत्वमा समर्थनका लागि आह्वान गरेकी थिइन्। ओलीको जवाफ स्पष्ट रूपमा सार्वजनिक भएको छैन। तर, ओलीले ‘आफू जवान नै भएको’, ‘अझै २० वर्ष नेतृत्वमा रहने सक्ने’ लगायतका अभिव्यक्ति दिँदै आएका छन्।