एयरपोर्टमा आफूलाई अपराधीझैँ जाँच गरिएको ओलीको गुनासो

३१ साउन, काठमाडौं ।

नेकपा एमालेका अध्यक्ष केपी शर्मा ओलीले विमानस्थलमा आफूलाई पटक–पटक कडा सुरक्षा जाँच गरिएको भन्दै आपत्ति जनाएका छन्। इलाममा लोकतान्त्रिक आदिवासी जनजाति महासंघको बैठकलाई सम्बोधन गर्दै ओलीले विमानस्थलमा आफूलाई अपराधीलाई जस्तो व्यवहार गरिएको गुनासो गरे। मेटल डिटेक्टर प्रयोग गरी पटक–पटक शरीर जाँच गरिएको भन्दै उनले सुरक्षा जाँचको शैलीप्रति असन्तुष्टि जनाएका हुन्। ‘मेटल डिटेक्टर लगाएको छ, यो गर्‍या छ, उ गर्‍या छ। के निकाल्न खोज्या? के बरामद गर्न खोज्या?’ उनले प्रश्न गरे।

विमानस्थलमा एक ठाउँमा जाँच गरिसकेपछि पनि अर्को ठाउँमा पुनः जाँच गर्ने गरिएको भन्दै ओलीले त्यसप्रति व्यंग्य गरे। काठमाडौं र भद्रपुर विमानस्थलमा समेत आफूले पटक–पटक यस्तो जाँच भोग्नुपरेको उनको भनाइ थियो। ‘एक ठाउँ जाँचेपछि त पुग्नुपर्ने, फेरि अर्को ठाउँ जाँच्छ। भद्रपुर आउँछु, त्यहाँ पनि जाँच्छ, फेरि मेटल यसो–यसो गर्छ। तमासा!’ उनले भने। आफूलाई लागूऔषध वा अवैध वस्तु बोकेको व्यक्तिजस्तो व्यवहार गरिएको भन्दै ओलीले प्रश्न गरे, ‘म न गँजडी, न जड्याहा, न ड्रगिस्ट। के खोज्या हो?’ विमानस्थलमा आफूलाई कडाइका साथ जाँच गर्ने तर सीमा नाकाबाट हुने तस्करी नियन्त्रणमा भने प्रभावकारी काम हुन नसकेको उनको आरोप थियो। ‘ट्रकका ट्रक तस्करी सिमानाबाट भएको भइछ। एअरपोर्टमा चाहिँ मेरो शरीरमा डिटेक्टर लाउँछ,’ उनले भने। विमानस्थलमा गरिएको सुरक्षा जाँचप्रति ओलीले सार्वजनिक रूपमा असन्तुष्टि जनाएको यो दोस्रोपटक हो। यसअघि गत माघमा पनि उनले आफूलाई सुन तस्करलाई जस्तो व्यवहार गरिएको भन्दै विमानस्थलको सुरक्षा जाँचप्रति आपत्ति जनाएका थिए।