दुई महिनामा कति परिवारले पाए जग्गाधनी पुर्जा ?

२० साउन, काठमाडौं । 

भूमि समस्या समाधान समितिले पछिल्ला दुई महिनामा ९७ परिवारलाई जग्गाधनी पुर्जा वितरण गरेको जनाएको छ। समितिका अनुसार २० जेठदेखि १६ साउनसम्म वितरण गरिएका पुर्जामध्ये ६ परिवार भूमिहीन दलित, ५८ परिवार भूमिहीन सुकुमवासी र ३३ परिवार अव्यवस्थित बसोबासी रहेका छन्। यस अवधिमा झापाको बुद्धशान्ति नगरपालिका–४, अर्जुनधारा नगरपालिका–११ र कन्काई गाउँपालिका–४ का लाभग्राहीलाई जग्गाधनी पुर्जा वितरण गरिएको समितिले जनाएको छ। यस्तै, बर्दियाको बढैयाताल गाउँपालिकामा भूमिहीन दलित तथा भूमिहीन सुकुमवासी गरी २९ परिवारले पुर्जा प्राप्त गरेका छन्।

चितवनको इच्छाकामना नगरपालिकामा भूमिहीन दलित र भूमिहीन सुकुमवासी गरी ३४ परिवारलाई जग्गाधनी पुर्जा वितरण गरिएको छ। हालसम्म एउटै स्थानीय तहमा सबैभन्दा धेरै पुर्जा इच्छाकामना नगरपालिकामै वितरण भएको समितिको भनाइ छ। यस्तै, डडेलधुराको अजेयमेरु गाउँपालिकामा अव्यवस्थित बसोबास गर्दै आएका सात परिवारलाई पनि जग्गाधनी पुर्जा प्रदान गरिएको समितिले जनाएको छ।