प्रहरी परिसरमै किन आत्म*दाहमा उत्रिए नथुनी मुखिया?

२४ मंसिर, सर्लाही ।

जिल्ला प्रहरी कार्यालय सर्लाहीको परिसरमै आत्मदाह प्रयास गर्ने व्यक्ति चन्द्रनगर गाउँपालिका–६, कामदका नथुनी मुखिया रहेका छन्। प्रहरी कार्यालय प्रवेश गरेका मुखियाले शरीरमा पेट्रोल छर्किएर आत्मदाह गर्ने प्रयास गरेका थिए। लाइटर निकालेर आगो लगाउन खोज्ने क्रममै प्रहरी र उनिसँग भएका अन्य व्यक्ति मुखियालाई तत्काल रोकिएकाले ठूलो दुर्घटना हुन पाएन।

अहिले उनी प्रहरी सुरक्षामा कार्यालयभित्रै राखिएका छन्। प्रहरीका अनुसार गरिमा विकास बैंकले घर–जग्गा लिलाम गरेको विषयमा असन्तुष्ट भएर मुखियाले आत्मदाह प्रयास गरेका हुन्। पछिल्लो समय सर्लाहीका विभिन्न स्थानका स्थानीयले गरिमा विकास बैंकले ‘ऋण दिने’ भन्दै जग्गाधनी प्रमाणपुर्जा तथा अन्य कागजात लिएर ऋण नदिई उल्टै घर–जग्गा लिलाम गरेको आरोप लगाउँदै आएका छन्। यस्तै गुनासो राख्न जिल्ला प्रहरी कार्यालय पुगेका पीडित समूहसँगै पुगेका नथुनी मुखियाले पत्रकारसँग कुरा राख्ने क्रममै आत्मदाह प्रयास गरेका थिए।

जिल्ला प्रहरी कार्यालय सर्लाहीका निमित्त सूचना अधिकारी प्रहरी निरीक्षक बिन्देश्वर यादवका अनुसार बैंकका प्रबन्धकसहितलाई बोलाएर छलफल गर्ने तयारी भइरहेको बेला केही स्थानीयसँगै कार्यालयमा प्रवेश गरेका मुखियाले अचानक पेट्रोल छर्केका थिए। उनका अनुसार गरिमा विकास बैंक मलंगवा शाखाले ऋणीहरूबाट नै आफूहरू असुरक्षित भएको भन्दै प्रहरीसँग सुरक्षा माग्दै निवेदन पनि दिएको छ।