बुबा–छोराद्वारा आमाछोरीमाथि निर्घात कुटपिट, घाइते बनाइ फरार

८ भदौ, सर्लाही ।

सर्लाहीको चन्द्रनगर गाउँपालिका–२ मा देवेन्द्र राय र उनका छोरा प्रविण रायले आमाछोरीमाथि निर्घात कुटपिट गरेको घटना बाहिरीएको छ। पीडित महिला ५० वर्षीय पानो देवी महतो र उनकी २६ वर्षीया छोरी उर्मिला देवी हुन्। पानो देवीका पति नथुनी महतोका अनुसार, शनिवार बुबा–छोराले मिलेर आफ्नी पत्नी र छोरीमाथि शारीरिक हमला मात्र नभई, उनीहरूसँग अनैतिक सम्बन्ध कायम गर्ने धम्कीसमेत दिएका थिए। “दुवैजनाले हाम्रा परिवारलाई निर्घात कुटपिट गरेको उनले भने।

घटनामा घाइते भएकी पानो र उर्मिला ईश्वरपुर नगरपालिका, बयलवासस्थित सिद्धिविनायक अस्पतालमा उपचाररत छन्। अस्पतालका चिकित्सकले जनाए अनुसार, पानोको हातमा जटिल चोट परेको छ भने दुवैको शरीरका विभिन्न भागमा निलडाम देखिएको छ। पीडित परिवारले घटनापछि तुरुन्तै इलाका प्रहरी कार्यालय केशरगंजमा निवेदन दिएका छन्। कुटपिट गर्ने बुबा–छोरा दुवै फरार रहेका छन्। प्रहरीको टोली उनीहरूलाई पक्राउ गर्न खोजीमा लागेको छ। स्थानीयका अनुसार देवेन्द्र रायकी श्रीमती र पानो देवीबीच खेतमा तरकारी टिप्ने विषयमा विवाद भएको र त्यसैबाट घटनाको सुरुआत भएको बताइएको छ। घटनाबारे थप विवरण आउन बाँकी ।