विपद् व्यवस्थापनको तयारीमा जुट्न सरकारको ध्यानाकर्षण
सारांश
- राष्ट्रियसभाका सदस्यहरुले बर्खायाम सुरु हुनै लागेकाले विपद् व्यवस्थापन र सम्भावित विपद्जन्य घटनाको जोखिम न्यूनीकरणका लागि आवश्यक तयारीमा जुट्न सभाअध्यक्षमार्फत सरकारको ध्यानाकर्षण गराउनुभएको छ ।
- राष्ट्रियसभाको आजको बैठकको शून्य समयमा बोल्दै सांसद गोपाल भट्टराईले मनसुन सुरुआतको प्रारम्भमै विपद्का घटनाहरु हुन थालेको भन्दै विपद् व्यवस्थापन र क्षति न्यूनीकरणको तयारीमा जुट्न सरकारलाई सुझाव दिनुभयो ।
- सांसद मायाप्रसाद शर्माले हुम्लाको तिलगाउँ पहिरोको उच्च जोखिममा परेको तथा गत वैशाख ३१ को वर्षापछिको पहिरोले हिल्सा जानेबाटो अवरोध भएको, स्थानीय विद्युत् गृहमा क्षति पुगेको भन्दै पहिरोको जोखिमा रहेको तिलगाउँका बासिन्दालाई सुरक्षित स्थानमा बसोबासको व्यवस्था गर्न सरकारसँग माग गर्नुभयो ।
५ जेठ ,काठमाडौँ ।
राष्ट्रियसभाका सदस्यहरुले बर्खायाम सुरु हुनै लागेकाले विपद् व्यवस्थापन र सम्भावित विपद्जन्य घटनाको जोखिम न्यूनीकरणका लागि आवश्यक तयारीमा जुट्न सभाअध्यक्षमार्फत सरकारको ध्यानाकर्षण गराउनुभएको छ । राष्ट्रियसभाको आजको बैठकको शून्य समयमा बोल्दै सांसद गोपाल भट्टराईले मनसुन सुरुआतको प्रारम्भमै विपद्का घटनाहरु हुन थालेको भन्दै विपद् व्यवस्थापन र क्षति न्यूनीकरणको तयारीमा जुट्न सरकारलाई सुझाव दिनुभयो ।
सांसद मायाप्रसाद शर्माले हुम्लाको तिलगाउँ पहिरोको उच्च जोखिममा परेको तथा गत वैशाख ३१ को वर्षापछिको पहिरोले हिल्सा जानेबाटो अवरोध भएको, स्थानीय विद्युत् गृहमा क्षति पुगेको भन्दै पहिरोको जोखिमा रहेको तिलगाउँका बासिन्दालाई सुरक्षित स्थानमा बसोबासको व्यवस्था गर्न सरकारसँग माग गर्नुभयो । सांसद गङ्गा बेलबासेले राष्ट्रिय निकुञ्जसम्बन्धी नयाँ ऐनको माग गर्नुभयो । सांसद गोपी सार्की अछामीले विद्युत् प्राधिकरणको लापर्वाहीले विद्युत् कटौती हुँदा व्यवसायी मर्कामा परेकाले त्यसको उचित व्यवस्थापन गर्न सरकारको ध्यानाकर्षण गराउनुभयो । सांसद जगप्रसाद शर्माले दाङको टरिगाउँ विमानस्थल, सिँचाइ, खानेपानी, शिक्षा, स्वास्थ्य, पर्यटनलगायतका मेघा परियोजनमामा बजेट सुनिश्चित गर्न माग गर्नुभयो । सांसद तारामान स्वाँरले कञ्चनपुरको पुनर्वास नगरपालिका–८ को सीमावर्ती क्षेत्रमा सशस्त्र प्रहरीको बोर्डर आउट पोष्ट स्थापना नहँुदा त्यस क्षेत्रमा आपराधिक घटना बढेर नागरिक त्रसित र असुरक्षित भइरहेकाले यसको सुनिश्चितताका लागि सरकारको ध्यानाकर्षण गराउनुभयो ।
सांसद तुलसाकुमारी दाहालले विवाहको उमेर घटाउने विषय संविधानमा व्यवस्था भएको बालबालिकाको हकअधिकारको विपरीत भएको उल्लेख गर्दै केही छिटपुट घटनालाई आधार मानेर विवाहको उमेर नघटाउन तथा यस विषयमा गहिरो अध्ययन गरेर मात्रै निर्णय लिन सभाअध्यक्षमार्फत सरकारको ध्यानाकर्षण गराउनुभयो । सांसद भगवती न्यौपानेले भर्खरै सम्पन्न सगरमाथा संवादमा विभिन्न देशका विशिष्ट व्यक्तिहरुको उपस्थिति भएर हिमालय क्षेत्रमा जलवायु परिवर्तनले पारेको असर, न्यूनीकरण एवं समाधानबारे ऐक्यबद्धता प्रकट गर्दै २५ बुँदे कार्यआह्वानपत्र जारी भएकामा सरकारलाई धन्यवाद ज्ञापन गर्नुभयो । उहाँले हुम्लामा हिमताल फुटेर नाम्खा गाउँ पहिरोको चपेटामा परेका पीडितलाई अविलम्ब राहत र क्षतिपूर्तिको व्यवस्था गर्दै जोखिम बस्तीलाई सुरक्षित स्थानमा स्थानान्तरण गर्न सरकारको ध्यानाकर्षण गराउनुभयो । सांसद राधेश्याम पासवानले सर्लाहीको ईश्वरपुर नगरपालिकाका उमेश नेपालीको विद्युतीय तार जडान गर्ने क्रममा करेन्ट लागेर घटनास्थलमै मृत्यु भएको घटनामा विद्युत् प्राधिकरणको लापरबाही देखिएको भन्दै दोषीमाथि कानुनी कारबाही गर्न तथा पीडितलाई क्षतिपूर्ति दिलाउन सरकारसमक्ष माग गर्नुभयो ।
प्रतिक्रिया