अमेरिकी उपराष्ट्रपति आजदेखि भारत भ्रमणमा

 ८ वैशाख, काठमाडौं ।

अमेरिकी उपराष्ट्रपति जेडी भेन्स आज चार दिने भारत भ्रमणका लागि दिल्ली आइपुग्दै छन् । उनीहरूको स्वागतका लागि सडकहरूमा ठूला–ठूला होर्डिङहरू राखिएको छ भने दिल्लीको सुरक्षा व्यवस्था कडा पारिएको छ । भारतीय मूलकी श्रीमती ऊषा र तीन सन्तानसहित आज बिहान भारत भ्रमणमा आउन लागेका भेन्सले आजै प्रधानमन्त्री नरेन्द्र मोदीसँग भेटवार्ता गर्ने कार्यक्रम छ ।

भेन्स दिल्ली आइपुगेपछि सबैभन्दा पहिले आफ्ना परिवारसहित स्वामीनारायण अक्षरधाम मन्दिर जानेछन् । भारतीय समय अनुसार आज साँझ साढे ६ बजे प्रधानमन्त्री मोदीले प्रधानमन्त्री निवासमा भेन्स र उनको परिवारको स्वागत गर्ने कार्यक्रम छ । प्रधानमन्त्री निवासमा डिनर, त्यसपछि वार्ता प्रधानमन्त्री मोदीले आज जेडी भेन्सको सम्मानमा रात्रिभोज (डिनर) आयोजना गरेका छन् । त्यसपछि भारत र अमेरिकाबीच औपचारिक वार्ता हुने छ । उक्त वार्तामा भारतीय टोलीमा विदेश मन्त्री एस जयशंकर, राष्ट्रिय सुरक्षा सल्लाहकार अजित डोभाल, विदेश सचिव विक्रम मिस्री र अमेरिकामा भारतका राजदूत विनय मोहन क्वात्रा सहभागी हुनेछन् । पाँच सदस्यीय अमेरिकी प्रतिनिधिमण्डल सहित आउन लागेका भेन्सले भारतका आगरा र जयपुर भ्रमण गर्ने कार्यक्रम पनि छ । ट्यारिफ, व्यापार र रक्षा प्रमुख एजेण्डा अमेरिकी राष्ट्रपति डोनाल्ड ट्रम्पले भारतसहित ६० देशमा ट्यारिफ (आयात शुल्क) लगाएको बेला उपराष्ट्रपति जेडी भेन्सको यो भ्रमणलाई चासोका साथ हेरिएको छ । त्यसैले दुवै देशबीच हुने वार्तामा व्यापारको विषय सबैभन्दा प्रमुख बन्ने छ ।

यसका साथै क्षेत्रीय सुरक्षा र आपसी सम्बन्धहरूबारे पनि छलफल हुने अपेक्षा गरिएको छ । भारत–अमेरिका व्यापार सम्झौताको पहिलो चरण सम्पन्न गर्न भेन्सको यो भ्रमण महत्त्वपूर्ण मानिएको भारतीय सञ्चार माध्यमले जनाएका छन् । दुवै देशले सन् २०३० सम्ममा आपसी व्यापार ५०० अर्ब डलरसम्म पुर्‍याउने लक्ष्य राखेका छन्, त्यसैले भेन्स र मोदीबीच व्यापार, आयात शुल्क र शुल्कका बाधाहरू हटाउनेबारे विस्तृत छलफल हुने सम्भावना छ । यसका साथै, ट्रम्प प्रशासनको ट्यारिफ नीतिका कारण देखिएको तनाव कम गर्दै आपसी समझदारी बनाउनेतर्फ पनि भेन्सको यो यात्रा महत्वपूर्ण हुने अपेक्षा गरिएको छ । यस्तो छ अमेरिकी उपराष्ट्रपतिको भ्रमण तालिका जेडी भेन्स आज बिहान दिल्ली आएपछि राति नै जयपुरतर्फ प्रस्थान गर्ने कार्यक्रम छ । त्यहाँ उनी रामबाग प्यालेसमा बस्ने छन् । २२ अप्रिल अर्थात् वैशाख ९ गते भेन्स जयपुरमा आमेर फोर्ट, सिटी प्यालेस र जन्तर मन्तर अवलोकन गर्ने छन् । उनी जयपुरमा आयोजना हुने इन्टरनेसनल बिजनेस समिटमा पनि सहभागी हुने छन् ।

२३ अप्रिल अर्थात् वैशाख १० गते भेन्स आफ्ना परिवारसहित आग्राको ताजमहल हेर्न जानेछन् । आगराबाट पुनः जयपुर फर्किएपछि २४ अप्रिल अर्थात् वैशाख ११ गते भेन्स अमेरिका फर्किने कार्यक्रम छ । भारतीय मूलकी हुन् भेन्सकी श्रीमती जेडी भेन्सको परिवारको यो पहिलो भारत भ्रमण हो । भेन्सकी पत्नी ऊषा भारतीय मूलकी हुन् । ऊषाका बाबुआमा आन्ध्र प्रदेशको पूर्वी गोदावरी र कृष्णा जिल्लाका हुन्, जो पछि अमेरिका गएका थिए र त्यहीँ बसोबास गरेका थिए । ऊषाको जन्म अमेरिकामै भएको थियो । उनी पहिलोपटक भारत आइरहेकी छन् । भेन्स र ऊषाका तीन सन्तान छन्– इवान, विवेक र मीराबेल । ऊषा भेन्सले आफ्नो पहिलो भारत भ्रमणलाई लिएर निकै उत्साहित रहेको बताएकी छन् ।