नेपाल प्रहरीको ३१औं आइजिपीमा दीपक थापा नियुक्त

काठमाडौं — नेपाल प्रहरीले नयाँ नेतृत्व पाएको छ। सोमबार बसेको मन्त्रिपरिषद् बैठकले दीपक थापालाई ३१औं प्रहरी महानिरीक्षक (आईजीपी) मा नियुक्त गरेको छ। हालका आईजीपी वसन्तबहादुर कुँवर आज राति १२ बजेदेखि अनिवार्य अवकाशमा जाने भएपछि थापा प्रहरी संगठनको नेतृत्व सम्हाल्ने भएका हुन्।

आईजीपी पदका लागि थापा सहित तीन जना प्रतिस्पर्धामा थिए। राष्ट्रिय प्रहरी प्रशिक्षण प्रतिष्ठानका प्रमुख सुदीप गिरी र काठमाडौं उपत्यका प्रहरी कार्यालय रानीपोखरीका प्रमुख टेकबहादुर तामाङ दाबेदार थिए। उनीहरू २०५२ भदौ १९ गते प्रहरी निरीक्षकमा भर्ना भएका हुन्।

थापाले आफ्नो करियरमा विभिन्न महत्वपूर्ण जिम्मेवारी सम्हालेका छन्। हालसम्म उनी प्रहरीको केन्द्रीय अनुसन्धान ब्युरो (सीआईबी) को निर्देशकका रूपमा कार्यरत थिए। एआईजीमा बढुवा भएपछि उनले प्रहरी प्रशासन विभाग प्रमुखको जिम्मेवारी सम्हालेका थिए।

उनको सुरुवाती सेवा इलाका प्रहरी कार्यालय बनेपा, गरुडा र रौतहटमा इन्चार्जका रूपमा रहँदै अघि बढ्यो। डीएसपीका रूपमा खोटाङ, बालुवाटार र महाराजगन्जमा काम गरेका थापाले एसपीमा बढुवा भएपछि अख्तियारको कोहलपुर र बुटवलमा काम गरे। चितवनमा जिल्ला प्रहरी प्रमुख बनेका उनी प्रहरी प्रधान कार्यालयको बजेट शाखामा समेत खटिएका थिए।

एसएसपी भएपछि आर्थिक प्रशासन महाशाखा र काठमाडौं उपत्यका अपराध अनुसन्धान कार्यालयको नेतृत्व सम्हाल्दा उनको भूमिका उल्लेखनीय रह्यो। डीआईजी भएपछि प्रबन्ध निर्देशनालयमा कार्यरत थापा बागमती प्रदेश प्रहरी प्रमुखको जिम्मेवारीमा रहे।

थापा २०८२ भदौ १९ गतेसम्म सेवामा रहनेछन्। त्यसपछि ३० वर्षे सेवा अवधिका कारण अवकाश हुनेछन्, यद्यपि ३० वर्षे सेवा अवधि हटाउने विधेयक संसद्मा विचाराधीन रहेकाले सेवा अवधि थप हुने सम्भावना छ।

थापाले आफ्नो कार्यकालमा संगठनको सुधार र अपराध अनुसन्धानलाई चुस्तदुरुस्त बनाउने प्रतिबद्धता व्यक्त गरेका छन्। प्रहरी संगठनमा लामो अनुभव बटुलेका थापा नेतृत्वमा आएपछि नेपाल प्रहरीले अपराध नियन्त्रण, अनुसन्धान र संगठनात्मक सुधारमा थप सशक्त हुने अपेक्षा

गरिएको छ।