कवाड हटाउन अझै अटेर गरे महानगर प्रहरी फेरि डोजर चलाउन बाध्य हुनेछ : नगर प्रहरी प्रमुख पाण्डे

२ फागुन,  काठमाडौँ — काठमाडौं महानगरपालिकाले आवासीय क्षेत्रमा जोखिम बढेको र स्थानीयको गुनासोका आधारमा कवाड संकलन र भण्डारणमा रोक लगाएको जनाएको छ । शुक्रबार पत्रकार सम्मेलन नै गरेर महानगर प्रहरीले जनगुनासोको आधारमा आवासीय क्षेत्र बाहेकका स्थानमा मात्रै कवाडी राख्ने र आवासीय क्षेत्रमा पूर्ण रुपमा हटाउने नगरसभाको निर्णय कार्यान्वयन गरिएको बताएको छ ।

महानगरपालिकाका नगर प्रहरी प्रमुख राजुनाथ पाण्डेले मापदण्डविपरीतका टहरा निर्माण गरी कवाडी व्यवसाय सञ्चालन गरिरहेका व्यवसायीहरुले सम्झाउँदासमेत नमानेको कारणले जबर्जस्ती गर्नुपरेको तर्क गरे । उनले कवाड व्यवसायमा रोक लगाउन नगर प्रहरीले सम्झाउने क्रममा अटेर गर्ने र प्रहरीमाथि आक्रमण हुने घटना भएको भन्दै यस्ता घटनालाई बंग्याउने काम भइरहेको बताए । उनले कवाड व्यवसायमा सञ्चालनमा रोक लगाउन सम्झाउन गएको प्रहरीमाथि आक्रमण हुँदा नगर प्रहरी घाइते भएको समेत बताए ।

उनले भने, ‘काठमाडौं महानगरको नगरसभाको बैठकले आवासीय क्षेत्र बाहेकका स्थानमा मात्रै कवाडी राख्ने र व्यवस्थापन गर्ने र आवासीय क्षेत्रमा पूर्ण रुपमा हटाउने भन्ने निर्णय कार्यान्वयन गरेका हौं ।’ महानगरपालिकाका नगर प्रहरी प्रमुख पाण्डेले अझै पनि धेरै ठाउँमा महानगरको आदेशलाई अटेर गरेर कवाड व्यवसाय सञ्चालन हुँदै आएको बताए । उनले कवाड हटाउन अझै अटेर गरे महानगर प्रहरी फेरि डोजर चलाउन बाध्य हुनेछ ।