प्रहरी कुट्नेलाई कारबाही गर्न गृहमन्त्रीको निर्देशन

३० माघ, काठमाडौं : गृहमन्त्री रमेश लेखकले प्रहरी कर्मचारीमाथि भइरहेको कुटपिट र दुर्व्यवहारका घटनाका दोषीलाई कारबाही गर्न निर्देशन दिएका छन्। बुधबार गृह मन्त्रालयमा प्रहरी महानिरीक्षक बसन्त बहादुर कुवँरसहित उच्च पदस्थ प्रहरी अधिकारीहरूलाई बोलाएर प्रहरीमाथि आक्रमण गर्नेलाई कारबाहीको दायरामा ल्याउन निर्देशन दिएका हुन्।

मन्त्री लेखकले शान्ति सुरक्षा कायम गर्ने क्रममा प्रहरीमाथि भइरहेको घटनाप्रति गम्भीर ध्यानाकर्षण भएको समेत बताए। शान्ति सुरक्षा कायम गर्न प्रहरी थप सक्रिय भएर लाग्नुपर्नेमा समेत उनले जोड दिए। ‘घटनामा जो सुकै संलग्न भए पनि कानुनी प्रक्रियाबाट कारबाही गर्न निर्देशन दिएको छु,’ मन्त्री जोशीले भने, ‘समाजमा शान्ति सुरक्षामा खलल पुर्याउने, समाजको पहरेदारीमा खटिने कर्मचारीमाथि जाइलाग्ने जोकोही भए पनि कानुनी दायरामा ल्याउन भनिसकेको छु।’ यसअघि, काठमाडौंको ठमेल र तनहुँमा प्रहरीमाथि कुटपिट र दुर्व्यवहारका घटना भएका थिए। त्यसका बारेमा सोमबार र मंगलबारको प्रतिनिधि सभा बैठकमा सांसदहरूले कुरा उठाएका थिए।