देशभरका अस्पतालमा आकस्मिकबाहेक सेवा बन्द

काठमाडौं । नेपाल चिकित्सक संघको आह्वानमा देशभरका अस्पतालमा मंगलबार आकस्मिकबाहेकका सम्पूर्ण स्वास्थ्य सेवा बन्द गरिएका छन् ।

वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमणको विरोध गर्दै संघले ओपीडीसहित आकस्मिकबाहेकका सेवा स्थगित गरेको हो ।

संघका अनुसार साउन ९ गते नारायणी अस्पतालमा कार्यरत डा. प्रमोद रामसहित चिकित्सक र स्वास्थ्यकर्मीमाथि आक्रमण भएको थियो । घटनामा डा. रामको टाउकोमा गम्भीर चोट लागेको तथा अस्पतालभित्र तोडफोडसमेत गरिएको जनाइएको छ ।

घटनामा संलग्न दोषीहरूलाई कानुनी दायरामा ल्याई कडा कारबाही गर्न माग गर्दै चिकित्सकहरूले देशभर एकदिने विरोधस्वरूप आकस्मिकबाहेकका सेवा बन्द गरेका हुन् ।

नेपाल चिकित्सक संघले स्वास्थ्य संस्थामा कार्यरत चिकित्सक तथा स्वास्थ्यकर्मीको सुरक्षा सुनिश्चित गर्न सरकारसँग माग गरेको छ । संघले स्वास्थ्यकर्मीमाथि हुने आक्रमणका घटनाले स्वास्थ्य सेवा प्रवाह नै प्रभावित हुने भएकाले यस्ता घटनाप्रति शून्य सहनशीलताको नीति अपनाउनुपर्ने जनाएको छ ।

सेवा बन्दका कारण देशभरका सरकारी तथा निजी अस्पतालमा नियमित उपचारका लागि पुगेका बिरामी प्रभावित भएका छन् । यद्यपि आकस्मिक सेवा, सघन उपचार कक्ष (आईसीयू) तथा अत्यावश्यक सेवाहरू भने नियमित सञ्चालनमा रहेका छन् ।