प्रचण्डका साथ छोडेका रहबर प्रदेश सभा सदस्यबाट पनि राजीनामा दिने तयारीमा

२६ पुस, जनकपुरधाम ।

नेपाली कम्युनिष्ट पार्टी बाट औपचारिक रूपमा राजीनामा दिएका नेता रहबर अन्सारीले प्रदेश सभा सदस्य पदबाट पनि राजीनामा दिने तयारी गरेका छन् । तत्कालीन नेकपा माओवादी केन्द्रबाट मधेश प्रदेशसभामा निर्वाचित अन्सारीले प्रदेश सभा सदस्य पदबाट पनि राजीनामा दिने तयारी गरेका  हुन् । रहबरका अनुसार पार्टीभित्र लामो समयदेखि देखिँदै आएको आन्तरिक असन्तुष्टि, विचार र व्यवहारबीचको अन्तर तथा पछिल्ला राजनीतिक घटनाक्रमले आफूलाई यो निर्णयमा पुग्न बाध्य बनाएको छ ।  “अब पार्टी मात्रै होइन, प्रदेश सभा सदस्यको हैसियतमा पनि निरन्तर बसिरहनु उपयुक्त ठानिनँ,” उनले भने ।

रहबर केही समययता माओवादी केन्द्रको नीति, नेतृत्व शैली र निर्णय प्रक्रियाप्रति असन्तुष्ट देखिँदै आएका थिए। प्रदेशस्तरमा जनतासँग गरिएका प्रतिबद्धता पूरा हुन नसकेको, संगठन कमजोर बन्दै गएको र आन्तरिक लोकतन्त्र सीमित भएको भन्दै उनले पटक–पटक असन्तुष्टि व्यक्त गर्दै मधेश प्रदेश सभामा सार्वजनिक रुपमै आफैँ अनुहारमा कालो मोसो छ्यापेका थिए । जसकारण लोसपाको सरकार ढलेको थियो । त्यसैको निरन्तरता स्वरूप उनले हालै पार्टी परित्याग गरेका थिए। पार्टीबाट बाहिरिएपछि उनी स्वतन्त्र हैसियतमा रहने वा अर्को राजनीतिक धार समात्ने भन्ने विषयमा विभिन्न अड्कलबाजी भइरहेका बेला मधेश प्रदेश सभा सदस्य पदबाट समेत राजीनामा दिने तयारीमा रहेको छ । उनले औपचारिक प्रक्रिया पूरा गरेर चाँडै प्रदेश सभामा मै गएर राजीनामा बुझाउने तयारी भइरहेको जानकारी पनि दिए। यद्यपि आगामी राजनीतिक यात्राबारे भने उनले स्पष्ट खुलाएका छैनन्। यस विषयमा माओवादी केन्द्रले हालसम्म औपचारिक प्रतिक्रिया सार्वजनिक गरेको छैन। यस विषयमा मधेश प्रदेशमा आधिकारिक रुपमा जानकारी नआएको स्रोतको भनाई छ ।