मलंगवा। सदरमुकाम मलंगवा नगरपालिका–२ स्थित शिक्षा कार्यालय नजिक रहेको सानो पुलको भ्वाङ परेको भाग हिजो साँझ स्थानीयको पहलमा मर्मत गरिएको छ। लामो समयदेखि पुल जीर्ण बन्दै गएपछि दैनिकजसो सवारी साधन दुर्घटनामा पर्ने अवस्था बनेको थियो।

सम्बन्धित निकायले चासो नदेखाएपछि स्थानीय युवा तथा मलंगवा नगर संरक्षण तथा सुधार समिति र वडा अध्यक्ष आफ्नै खर्च र श्रमदानमा हिजो साँझ पुल मर्मत गरेका हुन्। साँझपखै भ्वाङ परेको भाग ढलान गरि सम्याइएपछि सवारी आवागमन केही सहज बनेको छ।

स्थानीयका अनुसार पुल बिग्रिएकै कारण मोटरसाइकल र टेम्पोजस्ता सवारी बारम्बार फस्ने र लड्ने गरेका थिए। रातिको समयमा त झन् दुर्घटनाको जोखिम बढी हुने गरेको थियो।

वडा अध्यक्ष धिरेन्द्र साहले व्यक्तिगत रुपमा आर्थिक सहयोग गर्दै पुल मर्मत कार्यलाई सहज बनाएको जानकारी दिए। उनका अनुसार, “सम्बन्धित निकायबाट पहल नहुँदा हामीले स्थानीय युवासँग मिलेर तत्काल समस्या समाधान गर्ने निर्णय गरेका हौं। मैले पनि आवश्यक सामग्री खरिदका लागि सहयोग गरेको छु।”

स्थानीयबासीले यो अस्थायी मर्मत भए पनि स्थायी समाधानका लागि सम्बन्धित निकायले छिट्टै ध्यान दिनुपर्ने माग दोहोर्‍याएका छन्।