महोत्तरीमा धानको खेतमा नवजात शिशु फेला
२९ असोज, महोत्तरी ।
महोत्तरीको जलेश्वर नगरपालिका–४ स्थित धान खेतमा आज दिउँसो एक नवजात शिशु फेला परेको छ । जिल्ला प्रहरी कार्यालयका प्रहरी नायब उपरीक्षक शैलेन्द्र भट्टका अनुसार बुधबार दिउँसो करिब २ बजे भार्गवसर पोखरी नजिकैको धान खेतमा अन्दाजी १५/१६ दिनको शिशु जीवितै फेला परेको हो । जिउमा हल्का नीलो रङको लुगा लगाएको र गुलाफी रङको कपडामा बेरिएको अवस्थामा रहेको उक्त शिशुलाई वनमा घाँस काट्न गएका स्थानीयहरूले धान खेतमा देखेपछि प्रहरीलाई खबर गरेका थिए ।
प्रहरीले उक्त शिशुलाई तत्काल स्वास्थ्य परीक्षणको लागि प्रादेशिक अस्पताल जलेश्वर पुर्याएको छ भने शिशु पूर्णरूपमा स्वस्थ र सुरक्षित रहेको जनाइएको छ । शिशु कसको हो भन्ने सम्बन्धमा प्रहरीले अनुसन्धान अगाडि बढाएको छ । धान खेतमा किन छाडेको भन्ने सम्बन्धमा जिल्लाका सबै प्रहरी युनिटमा खोजतलास गर्न भनिएको प्रनाउ भट्टले बताए ।
Post Comment