असोज २२, धनुषा। धनुषाको पूर्व–पश्चिम राजमार्गमा प्रतिबन्धित लागुऔषध खैरो हिरोईन (ब्राउन सुगर) सहित दुई जनालाई इलाका प्रहरी कार्यालय ढल्केवरले पक्राउ गरेको छ। पक्राउ पर्नेमा सिरहाको मिर्चैया नगरपालिका–७ का २४ वर्षीय निराजन यादव र सप्तरीको राजविराज नगरपालिका–९ का ३९ वर्षीय रोहन कुमार सिंह रहेका छन्।

प्रहरीका अनुसार सोमबार दिउँसो करिब ४ बजे पूर्वबाट पश्चिमतर्फ आउँदै गरेको बा.प्र.०२–००२प–२०८७ नम्बरको मोटरसाइकललाई धनुषाको गणेशमान चारनाथ नगरपालिका–७, पोतांता चौक नजिक चेकजाँचका लागि रोकिएको थियो।

चेकजाँचका क्रममा मोटरसाइकलको पछाडि सवार निराजन यादवले भाग्ने प्रयास गर्दै झाडीमा एउटा वस्तु फालेका थिए। प्रहरीले तत्काल खोजी गर्दा उनले फालेको कालो प्लास्टिकको पोकाभित्र ३७.९ ग्राम तौलको खैरो हिरोईन बरामद भएको इलाका प्रहरी कार्यालय ढल्केवरका प्रमुख प्रहरी निरीक्षक जटाशंकर यादवले जानकारी दिनुभयो।

लागुऔषधसहित पक्राउ परेका दुवै जनालाई जिल्ला प्रहरी कार्यालय धनुषामा ल्याई थप अनुसन्धानका लागि धनुषा जिल्ला अदालतबाट ८ दिनको म्याद थप गरिएको प्रहरीले जनाएको छ।