१ असार, हेटौंडा ।

मकवानपुरको मनहरी गाउँपालिकामा पाँच वटा पक्की पुल निर्माण भएको छ । २०७७ सालमा एकैपटक ठेक्का लगाएर काम सुरु भएका ५ वटा पक्की पुल पाँचै वर्ष अवधि लगाएर भर्खरै निर्माण सम्पन्न भएका छन् । विगतमा झोलुङ्गे पुलले सिंगै गाउँलाई जोडेको मनहरीमा स्थानीय सरकार स्थापनाको ८ वर्षमा पक्की पुल बनेका हुन् । पाँच वटै पक्की पुलको निर्माण मनहरी गाउँपालिकाले आफ्नै आन्तरिक स्रोतबाट गरेको हो ।

जिल्लाको ८ वटा गाउँपालिकामध्ये सबैभन्दा ठूलो राजश्व स्रोत भएको पालिका हो, मनहरी । गाउँपालिकाले निर्माण गरेको पाँच वटा पुलले ४ वटा वडाहरुलाई जोड्छ । ती सबै वडा तरकारी उत्पादनको पकेट क्षेत्र हुन् । आफ्नो आन्तरिक स्रोतबाट करिब साढे ३३ करोड रुपैयाँ खर्चिएर पुल निर्माण गरिएको गाउँपालिका अध्यक्ष रञ्जन कालाखेतीले जानकारी दिए । पाँच वटा पुलमध्ये २ वटा पक्की पुलको शनिवार बागमती प्रदेशसभा सदस्य इन्द्रबहादुर बानियाँले उद्घाटन गरेका छन् । बानियाँले मनहरी–३ मा पर्ने हाँडिखोला र ठाडोखोलामा निर्माण गरिएको पुलको उद्घाटन गरेका हुन् । ३५ मिटर लम्बाईको हाँडिखोला पुल भैरव/नारायणम जेभीले ५ करोड ३५ लाख ५१ हजार रुपैयाँमा ठेक्का सम्झौता गरी निर्माण गरेको छ । ९० मिटर लम्बाई ८.४० मिटर चौडाइको ठाडोखोला पुल हिराचन/बानियाँ जेभीले ८ करोड ६७ लाख ५ हजार रुपैयाँमा सम्झौता गरी काम गरेको थियो ।

पाँच वटामध्ये ३ वटा पक्की पुल गत वर्ष नै सम्पन्न भएर उद्घाटन गरिएको थियो । मनहरी–३ र ४ जोड्ने ट्वाङ्ग्रा खोला पुल, ३ र ४ नम्बर वडा नै जोड्ने मसिने खोला पुल मनहरी १ र २ जोड्ने च्यापलखोला पुल गतवर्ष जेठमा उद्घाटन भएको हो । ट्वाङ्ग्रा खोला पुल ६ करोड ४९ लाख ६० हजार रुपैयाँमा, मसिने खोला पुल ६ करोड ५९ लाख ५० हजार रुपैयाँमा र च्यापल खोला पुल ६ करोड २८ लाख ९८ हजार रुपैयाँमा निर्माण गरिएको गाउँपालिकाले जानकारी दिएको छ । तीन वटै पुल निर्माणको काम बानियाँ/हिराचन जेभीले गरेको हो । बााँनिया निर्माण सेवा, सांसद इन्द्रबहादुर बानियाँकै कम्पनी हो । उनै बानियाँले पुलको उद्घाटन गरेका छन् । यहि क्षेत्रबाट उनी प्रदेशसभा सदस्य निर्वाचित भएका थिए । गाउँपालिकाले दुई वर्षभित्र निर्माण सम्पन्न गर्ने गरि २०७७ मा ५ वटा पुल निर्माणको बहुवर्षीय ठेक्का लगाएको थियो ।