नेसपा केन्द्रीय सदस्य साहसहितका नेताहरू माओवादीमा प्रवेश

५ वैशाख, काठमाडौँ ।

नेपाल समाजवादी पार्टी (नेसपा)का केन्द्रीय सदस्य रहित साहसहितका नेताहरू नेकपा माओवादी केन्द्र प्रवेश गरेका छन् । हुलाकी राजमार्ग केन्द्रित जनजागरण अभियानअन्तर्गत बहादुरगञ्जमा भएको कार्यक्रममा माओवादी केन्द्रका अध्यक्ष पुष्पकमल दाहाल ‘प्रचण्ड’ले उनीहरूलाई पार्टीमा स्वागत गरेका हुन् । माओवादीमा प्रवेश गर्नेहरूमा नेपाली कांग्रेसका पूर्ववडा अध्यक्ष सञ्जय गुप्ता र नेकपा एमालेका पूर्ववडा अध्यक्ष मसरोफ आलम पनि छन् । साथै अन्य स्थानीय नेताहरू रहेका जनाइएको छ ।

बहादुरगञ्जमा  भएको कार्यक्रमको शुरूआतमा अध्यक्ष प्रचण्डले माओवादी आन्दोलनको उद्देश्य, तराई–मधेशको विकास, हुलाकी राजमार्गको भूमिका र सीमावर्ती क्षेत्रका जनताको समस्या समाधानमा पार्टीको दृष्टिकोण प्रस्तुत गरेका छन् । उनले माओवादी नेतृत्वको सरकार परिवर्तन प्रकृया नै गैरकानूनी भएको बताए । ‘मैले भ्रष्टाचारविरुद्ध र सुशासनको अभियान शुरू गर्दागर्दै, रातको अँध्यारोमा सहमति गरेर सरकार ढालियो । तपाईंहरूले संख्याको बलमा अलोकतान्त्रिक रूपमा हटाउनुभयो, तर म जनतामा जान्छु र जनताको मतको बलमा पुनः फर्कन्छु। भ्रष्टहरूलाई छोडिन्न भनेर भनेको छु,’ उनले भने ।