ट्याक्टर दुर्घटना प्रकरण : छोरा चन्दन निर्दोष रहेको बुबाआमाको दाबी

२८ असोज,  मलंगवा नगरपालिकाको वडा न-६,खुटौना र वडा न-७, मुसैलीको बीचमा पर्ने नहरमा ट्याक्टर पल्टिँदा ट्याक्टरले च्यापेर नहरमा माछा मारिरहेका एक बालकको मृत्यु तथा ३ बालक घाइते भएको घटनाका वास्तविक अपराधी जोगाउन सर्लाही प्रहरीले निर्दोषलाई समातेर अपराध सकार्न यातना दिएको पिडितका परिवारले आरोप लगाएका छन् ।

प्रहरीले गत असोज १७ गते बिहान घटना भएलगत्तै ट्याक्टरका चालक खुटौना निवासी गगनदेव यादवका छोरा संजिब यादव र ट्याक्टरमा सवार सोही गाउँका बिनोद यादवका छोरा चन्दन यादवलाई पक्राउ गरि जिल्ला प्रहरी कार्यालय मलंगवामा लगि हिरासतमा राखेकाे थियो ।घट्नाको भोलिपल्टै प्रहरीले ट्याक्टर चालक संजिवलाई छाडेका थिए। प्रहरीले चालकलाई छाडेको तर आफ्नो छोरा चन्दनलाई कुटपिट गरि जबर्जस्ती हिरासतमा राखेर यातना दिइरहेको पिता बिनोदकाे आराेप छ । प्रहरीले आफुहरुलाई छोरासँग भेट समेत गर्न नदिइरहेको उनले गुनासो गरेका छन् ।

प्रहरीले छोरालाई तँसँग नागरिकता छ ,तँ पछि आफै छुटिहाल्छस् संजिबसँग नागरिकता छैन उसलाई छुट्न समस्या पर्छ त्यसैले मैलेनै चलाइरहेको ट्याक्टरबाट दुर्घटना हुँदा बालकको ज्यान गएको भनि स्विकार गरिस् भने पछि तँलाई पनि छाडि दिन्छौ भनि झुठो आस्वाशन दिएर ट्याक्टर चलाउनसमेत नजानेको निर्दोष छोरालाई फसाएको गुनासो गरे।यस विषयमा जिल्ला प्रहरी कार्यालयमा उजुरी दर्ता गराउन जाँदा दर्ता गर्न नमानेपछि असोज २० गते जिल्ला प्रशासन कार्यालयमा गएर उजुरी दिएको र त्यहाँबाट असोज २१ गते उजुरी दर्ता गर्नकोलागि दिएको आदेश पत्र लिएर पुनः प्रहरी कार्यालयमा जाँदा त्यहाँका प्रहरीले जिल्ला प्रशासनको लिखित आदेशलाई समेत लत्याएर उजुरी दर्ता गर्न नमानेको उनले बताए । निवेदन लिएर जाँदा प्रहरीले आफुलाई पनि छोरासँगै थुनेर खोर भित्रै सँडाइदिन्छु भनि धम्की दिएर भगाएको पीडितले दुखेसो पोखे।

प्रहरीले लेनदेनमा संजिबलाई उन्मुक्ति दिएर निजले गराएको दुर्घटनाको जिम्मा छोरा चन्दनलाई जबर्जस्ती स्विकार्न लगाएर एउटा निर्दोषलाई फसाउन खोजेको भन्दै उनले न्यायको लागि पहल गरिदिन सबैसँग आग्रह गरेका छन् ।
चालक थुनामुक्त भएको दिनदेखिनै फरार भएकोले निजलाई पक्राउ गरि घट्नाको बास्तविकता बारे पत्ता लगाई वास्तविक दाेषीलाई कार्वाहीकाे दायरामा ल्याउ पिडित परिवारले माग गरेका छन् ।