अन्य

अफतावका छोरा फिरदोस बने कांग्रेस सहमहामन्त्री

प्रेस संवाददाता

बिहिबार, आश्विन २९, २०८३

१०७ पटक हेरिएको

अफतावका छोरा फिरदोस बने कांग्रेस सहमहामन्त्री

प्रेस संवाददाता

नेपाली कांग्रेसका पुराना नेता अफताव आलमका छोरा मो.
फिरदोस आलम सहमहामन्त्रीमा निर्वाचित भएका छन् ।
उनी कांग्रेसको १५औं महाधिवेशनबाट मधेशी क्लस्टरबाट सहमहामन्त्रीमा निर्वाचित भएका हुन् ।

२९ असोज, काठमाडौं । नेपाली कांग्रेसका पुराना नेता अफताव आलमका छोरा मो. फिरदोस आलम सहमहामन्त्रीमा निर्वाचित भएका छन् ।

उनी कांग्रेसको १५औं महाधिवेशनबाट मधेशी क्लस्टरबाट सहमहामन्त्रीमा निर्वाचित भएका हुन् ।

कांग्रेसको आधिकारिक फेसबुकमार्फत पार्टीले सहमहामन्त्री पदमा निर्वाचित भएकोभन्दै फिरदोस आलमलाई बधाई तथा सफल कार्यकालको शुभकामना दिइएको छ ।

उनी २१ फागुनमा सम्पन्न प्रतिनिधिसभा निर्वाचनमा मधेश प्रदेशमा कांग्रेसका तर्फबाट निर्वाचित हुने एक्ला सांसद हुन् ।

फिरदोस रौतहट–२ बाट २९ हजार ५२८ मतसहित प्रतिनिधिसभा सदस्यमा निर्वाचित भएका थिए ।

उनका निकटतम् प्रतिस्पर्धी नेपाली कम्युनिस्ट पार्टीका उम्मेदवार किरणकुमार साहले १८ हजार ४४२ मत पाएका थिए ।

फिरदोसका पिता मोहम्मद आफताब आलम रौतहटबाट पटक–पटक निर्वाचित भएका थिए । उनी २०६४ सालको संविधानसभा निर्वाचनको अघिल्लो दिन रौतहटको राजपुरमा भएको बम विस्फोट र त्यसपछि भएको भनिएको हत्याकाण्डका कारण चर्चामा आएका थिए ।

उक्त प्रकरणमा रौतहट जिल्ला अदालतले अफतावलाई २०८१ वैशाखमा जन्मकैदको सजाय सुनाएको थियो । तर, २०८२ जेठमा उच्च अदालत जनकपुरको वीरगञ्ज इजलासले प्रमाण पर्याप्त नभएको ठहर गर्दै उनलाई सफाइ दिएको थियो ।

सफाइ पाएपछि जेलमुक्त भएका आलमको २१ कात्तिक २०८२ सालमा उपचारका क्रममा ६३ वर्षको उमेरमा काठमाडौंमा निधन भएको थियो ।