स्रोत नखुलेको ३१ लाख नगदसहित एक जना चिनियाँ नागरिक पक्राउ

९ भदौ, काठमाडौं ।

काठमाडौँमा भाडाको घरमा बस्दै आएका एक जना चिनियाँ नागरिक स्रोत नखुलेको ३१ लाख रुपैयाँ नगदसहित पक्राउ परेका छन्। लागु औषध नियन्त्रण ब्यूरोले काठमाडौँ महानगरपालिका- १५ चौमतीबाट पासपोर्ट नम्बर ईएल १७८१३८ भएका ५२ वर्षीय मा युगुबीलाई नियन्त्रणमा लिएको हो। चिनियाँ नागरिकले घर भाडामा लिएर बसी लागुऔषध कारोबार गर्दै आएको भन्ने विशेष सूचना प्राप्त भए पश्चात ब्यूरोबाट खटिएको प्रहरी टोलीले खोजतलास गरेको थियो।

उनलाई बरामद नगद तथा अन्य सामानहरूसहित थप अनुसन्धान कारबाहीको लागि प्रहरी परिसर काठमाडौँमा बुझाइएको छ। उनको साथबाट पासपोर्ट, सुन काट्न प्रयोग गरिने कैँची, ह्याम्मर, डिजिटल तराजु, क्यालकुलेटर, विभिन्न कम्पनीका मोबाइल थान ४, एनआईएमबी बैंकको चेकबुक थान २ र एनआईसी एसिया बैंकको चेकबुक थान १ समेत बरामद भएको छ। ती चिनियाँ नागरिक हालसम्म ६ पटक नेपाल आएर फर्केको र पछिल्लो पटक जुलाई २३, २०२६ मा नेपाल आएको अभिलेखबाट देखिएको ब्यूरोका प्रवक्ता एवम् सूचना अधिकारी प्रहरी उपरीक्षक दुर्गा राज रेग्मीले जनाएका छन्।