सुदूरपश्चिमको मुख्यमन्त्रीमा खगराज भट्ट नियुक्त

२९ साउन, धनगढी ।

सुदूरपश्चिम प्रदेशको मुख्यमन्त्रीमा नेपाली कम्युनिस्ट पार्टी (नेकपा) का खगराज भट्ट नियुक्त भएका छन्। प्रदेश प्रमुख नजिर मियाँले भट्टलाई शुक्रबार मुख्यमन्त्रीमा नियुक्त गरेका हुन्। भट्टले शुक्रबार बिहान प्रदेश प्रमुख मियाँसमक्ष मुख्यमन्त्रीमा नियुक्त गर्न माग गर्दै दाबी पेस गरेका थिए। मुख्यमन्त्री कमलबहादुर शाहले बिहीबार पदबाट राजीनामा दिएपछि प्रदेश प्रमुख मियाँले नयाँ सरकार गठनका लागि आह्वान गरेका थिए। संविधानको धारा १६८ को उपधारा (२) बमोजिम मुख्यमन्त्रीमा दाबी पेस गर्न प्रदेश प्रमुखले शुक्रबार बिहान ११ बजेसम्मको समय दिएका थिए।

तोकिएको समयभित्रै नेकपा र एमालेका सांसदहरूको समर्थनसहित भट्टले मुख्यमन्त्रीमा दाबी पेस गरेका थिए। भट्टको नियुक्तिसँगै शुक्रबार दिउँसो ३ बजे शपथ ग्रहणको तयारी गरिएको नेकपाका एक सांसदले बताए। मुख्यमन्त्री भट्टले शुक्रबार नै सानो आकारको मन्त्रिपरिषद् गठन गर्ने सम्भावना रहेको नेताहरूले बताएका छन्। नेकपा र एमालेबीच सुदूरपश्चिम प्रदेशमा यसअघि नै मन्त्रालय भागबन्डा टुंगिएको छ। जसअनुसार नेकपाले मुख्यमन्त्रीसहित चार मन्त्रालय र एमालेले तीन मन्त्रालय पाउने सहमति भएको छ। स्रोतका अनुसार एमालेले आर्थिक मामिला, सामाजिक विकास र वन वा कृषिमध्ये एउटा मन्त्रालयको नेतृत्व गर्नेछ।

यसअघि ३१ असारमा एमालेले बजेटप्रति असहमति जनाउँदै मुख्यमन्त्री शाह नेतृत्वको सरकारलाई दिएको समर्थन फिर्ता लिएको थियो। त्यसपछि बिहीबार प्रदेश सभालाई सम्बोधन गर्दै शाहले मुख्यमन्त्री पदबाट राजीनामा दिने घोषणा गरेका थिए। प्रदेश प्रमुखलाई राजीनामा बुझाएलगत्तै नयाँ सरकार गठनका लागि आह्वान गरिएको थियो। सोहीअनुसार एमालेको समर्थनमा भट्टले मुख्यमन्त्रीका लागि दाबी पेस गरेका थिए।