मिथिलाञ्चलमा आज वट सावित्री पर्व मनाइँदै

२ जेठ, सर्लाही ।

मिथिलाञ्चल क्षेत्रमा आज विवाहित मैथिली महिलाले पतिको दीर्घायु, सुस्वास्थ्य र पारिवारिक समृद्धिको कामना गर्दै वट सावित्री पर्व श्रद्धा र भक्तिपूर्वक मनाइरहेका छन् । मिथिला क्षेत्रमा यस पर्वलाई ‘वसराइत पावइन’ नामले समेत चिनिन्छ । हरेक वर्ष जेठ कृष्ण औँसीका दिन मनाइने यस पर्वमा महिलाले निराहार व्रत बसेर वर र पीपलको रुखमुनि सामूहिक रूपमा पूजा–आराधना गर्ने परम्परा छ । पूजा क्रममा पान, सुपारी, केरा, फलफूल, धूप तथा अगरबत्ती चढाइन्छ भने वरको रुखमा रातो र पहेँलो धागो बेरेर पूजा गरिन्छ ।

व्रतालु महिलाले धानको लावा भुटी बेसारबाट गौरीको आकृति बनाउने, वरको रुखलाई रंग्याइएको काँचो धागोले बेर्ने तथा औँसीका दिन विधिपूर्वक पूजा गर्ने चलन छ । भोलिपल्ट बिहान स्नानपछि ब्राह्मणलाई भोजन गराई दक्षिणा दिएसँगै पर्व समापन गरिन्छ । धार्मिक मान्यताअनुसार सत्ययुगमा सावित्रीले कठोर व्रत र तपस्यामार्फत यमराजबाट आफ्ना पति सत्यवानको प्राण फिर्ता ल्याएकी थिइन् । सोही विश्वासका आधारमा मिथिलाञ्चलमा विवाहित महिलाले पतिको दीर्घायु र अटल सौभाग्यको कामना गर्दै यो पर्व मनाउने परम्परा रहँदै आएको छ ।