अनियमितताको आरोपमा वडाध्यक्षद्वारा मेयर–अधिकृतमाथि आक्रमणको प्रयास

सर्लाही । हरिपुर्वा नगरपालिकाका नगरप्रमुख विनोद कुमार साह र प्रमुख प्रशासकीय अधिकृत सिकिन्द्र प्रसाद साहमाथि हिजो साँझ आक्रमणको प्रयास भएको छ ।

लालबन्दी बजारमा रहेको अधिकृत साह बस्दै आएको भाडाको कोठामा आएर हरिपुर्वाका केही वडाध्यक्षको नेतृत्वमा स्थानीयले आक्रमणको प्रयास गरेका हुन् । आक्रोशित वडाध्यक्ष र स्थानीयले मेयर र ‘हाकिम’ मिलेर लालबन्दीबाटै नगरपालिकाको कार्यालय सञ्चालन गरी अनियमिता गरेको र पालिकाभित्रका नागरिकको समस्याप्रति बेवास्ता गरेको आरोप लगाएका छन् ।

नगरपालिका कार्यालयले उपलब्ध गराएको प्रमुख प्रशासकीय अधिकृत साह बस्ने कोठामा रहेका टेबल, कुर्सीसहित अन्य सरसामग्री तोडफोड भएको छ । मेयर र हाकिममाथि आक्रमणको प्रयास भएपछि जोगाउन खोज्दा हरिपुर्वा नगरपालिका–६, का वडाध्यक्ष रामसोगारथ राय यादवको नाक र आँखामा सामान्य चोट लागेको छ ।

तत्कालै इलाका प्रहरी कार्यालय लालबन्दीबाट प्रहरी टोली घटनास्थलमा पुगेर रोकेपछि नगरप्रमुख र प्रमुख प्रशासकीय अधिकृतमाथि हातपात हुन पाएन । हरिपुर्वा नगरपालिका ८ का वडाध्यक्ष रामेश्वर रायले प्रमुख प्रशासकीय अधिकृतले लालबन्दीमा बस्ने र कार्यालयको कागजात झोलामा राखेर लालबन्दीबाटै नगरपालिका चलाएको आरोप लगाएका छन् ।

चपुर घर भएका प्रमुख प्रशासकीय अधिकृत साहले कार्यालयमा कर्मचारी नियुक्ति गर्दा, विभिन्न ठेक्कापट्टाको फर्म छनौट गर्दालगायत अन्य काममा चन्द्रनिगाहपुरकै मानिसलाई प्राथमिकता दिएको असन्तुष्ट वडाध्यक्षहरुको आरोप छ ।

तर मेयर तेलीले भने जेनजी आन्दोलनको क्रममा नगरपालिका कार्यालयमा तोडफोड भएपछि भएका कागजात र उपकरण जलेपछि अब के–कसरी सेवा दिने, भुक्तानी कसरी गर्ने भन्ने विषयमा छलफल भइरहँदा एक्कासी अराजक शैलीमा आक्रमण गरिएको बताएका छन् । उनले जेनजी आन्दोलनमा आगजनी गर्ने कार्यमा संलग्नहरु नै आज लालबन्दीमा आएर हुलहुज्जत गरेको समेत आरोप लगाए ।