दुई दर्जन होटेलमा क्षति, २५ अर्बको नोक्सानी

२७ भदौ, काठमाडौं ।

होटेल संघ नेपालले जेनजी आन्दोलनका क्रममा दुई दर्जन होटेलमा क्षति पुगेको जनाएको छ । काठमाडौं उपत्यका, पोखरा, बुटवल, भैरहवा, झापा, मोरङ विराटनगर, धनगढी, महोत्तरी, दाङ तुल्सीपुरलगायत क्षेत्रमा सञ्चालित स्वदेशी तथा विदेशी ब्रान्डसमेतका चर्चामा रहेका होटेलमा तोडफोड, आगजनी र लुटपाट भएको संघले विज्ञप्तिमार्फत जनाएको छ ।

काठमाडौंमा रहेको हिल्टन होटेलको मात्रै आठ अर्बभन्दा बढीको क्षति भएको छ । देशैभर करिब २५ अर्ब भन्दा बढी आर्थिक क्षति भएको प्रारम्भिक अनुमान रहेको संघले जनाएको छ ।  यसबाट प्रभावित होटेल मर्मत सम्भार, पुनर्निर्माण नगरी सञ्चालनमा आउन नसक्ने संघको भनाइ छ । दुई हजारभन्दा बढी कामदार कर्मचारीको रोजगारी प्रभावित भएको छ ।  “हाल संचालन अवरुद्ध भएका यी होटलहरूले व्यहोर्नु पर्ने बैंक तथा वित्तीय संस्थालगायत आर्थिक दायित्व नियमित रूपमा तिर्न/बुझाउन असमर्थ रहने देखिएको छ,” संघले भनेको छ ।

पब्लिक लिमिटेड कम्पनीसहितको निजी क्षेत्रमा भएको ठूलो लगानी र सम्पत्तिमा भएको पीडादायी क्षतिको तत्काल शक्तिशाली अधिकारप्राप्त न्यायायिक समितिबाट जाँचबुझ गर्न संघले माग गरेको छ ।  “अपराधीलाई उचित क्षतिपूर्तिसहितको दण्ड तथा मर्मत सम्भार पुनर्निर्माणका लागि राज्यबाट आर्थिक प्याकेज उपलब्ध गराउनुपर्छ,” संघले विज्ञप्तिमा भनेको छ, “लगानीकर्ताको मनोबल कायम राख्न तथा आर्थिक स्थायित्व तथा समृद्धि हासिल गर्दै परिवर्तनकारी नयाँ युगमा पर्यटन विकासको कार्यमा सँगसँगै अघि बढ्न होटेल संघ नेपाल माग गर्छ ।”