साउदीमा ९ महिनामै १३६ नेपाली कामदारको मृत्यु

१४ चैत,  काठमाडौं-

गएको ९ महिनामा मात्रै साउदी अरबमा १३६ नेपाली कामदारको मृत्यु भएको छ । कार्यस्थलमै, सडक दुर्घटना, आत्महत्या, हृदयाघात र प्राकृतिक कारणबाट साउदीमा नेपाली कामदारहरूको मृत्यु भएको हो ।

साउदीस्थित नेपाली दूतावासका अनुसार यस अवधिमा प्राकृतिक कारणबाट ७०, सडक दुर्घटनामा २१ र कार्यस्थलको दुर्घटनामा परी १६ जना नेपाली कामदारको ज्यान गएको छ । १६ जना नेपालीले भने आत्महत्या गरेका छन् । अन्य नेपालीको मृत्युको कारण खुलाइएको छैन । साउदीमा ज्यान गुमाउने कामदारको पोस्टमार्टम गरिँदैन । जसले गर्दा आधाभन्दा बढी कामदारको मृत्युको कारण खुल्दैन ।

साउदीमा ज्यान गुमाएका मध्ये १२१ नेपालीको शव नेपाल पठाइसकिएको र १५ जनाको पठाउने प्रक्रियामा रहेको दूतावासले उल्लेख गरेको छ । मृतक कामदारको शव नेपाल पठाउन कम्पनी अनुसार २ हप्तादेखि १ महिनासम्म लाग्ने गर्दछ । यद्यपि, आत्महत्याको घटनामा भने शव पठाउन ३ महिनासम्म लाग्ने गरेको छ ।  पछिल्ला वर्षहरूमा वैदेशिक रोजगारीका क्रममा ज्यान गुमाउने नेपालीको सङ्ख्या बढ्दै गएको छ । गत आर्थिक वर्ष मात्रै १ हजार ३४६ नेपाली कामदारको विदेशमै मृत्यु भएको थियो । जसमध्ये साउदीमा ३४९ जनाको ज्यान गएको थियो ।