पत्रकार महासंघ सर्लाही शाखाको अध्यक्षमा ठाकुर, को-को आए कार्यसमितिमा ?

२९ मंसिर,  सर्लाही – नेपाल पत्रकार महासंघ सर्लाही शाखाको अध्यक्षमा ओमप्रकाश ठाकुर निर्वाचित भएका छन् । महासंघको २७ औँ महाधिवेशन अन्तर्गत हिजो हरिपुरस्थित रेडक्रस भवनमा सम्पन्न निर्वाचनबाट ४६ मत प्राप्त गरी ठाकुर तीन वर्षीय कार्यकाललागि अध्यक्षमा चुनिएका हुन् । ठाकुरका प्रतिस्पर्धी रामगोविन्द यादवले १४ मत प्राप्त गरेका छन् ।

सर्लाहीबाट नेपाल पत्रकार महासंघमा सदस्य रहेका ६२ जना सदस्यमध्ये मतदानमा ६० जना सहभागी भएका थिए । यस्तै महासंघ जिल्ला शाखाको उपाध्यक्षमा मुकेश झा ४२ मत प्राप्त गरी बिजयी हुँदा अर्का उम्मेदवार मनोजकुमार यादवले १७ मत प्राप्त गरे । यस्तै उपाध्यक्ष महिलामा बन्दना झा ३२ मत ल्याएर बिजयी भएकी छन् । झाका प्रतिद्वन्द्वी मिरा रानीले २४ मत प्राप्त गरिन् । त्यस्तै सचिवमा सोम दियाली ३२ मत प्राप्त गरी बिजयी हुँदा प्रतिस्पर्धी सिंहबहादुर थापा (श्रवण) ले १४ मत प्राप्त गरेका निर्वाचन समितिले जनायो । कोषाध्यक्षमा घनश्याम सिंह ३२ मत प्राप्त गरी निर्वाचित हुँदा कोषाध्यक्षका अर्का उम्मेदवार घनश्याम बलम्पाकीले २७ मत प्राप्त गरेका छन् ।

महासंघको केन्द्रीय परिषद् सदस्यमा सत्यप्रकाश यादव ३१ मत ल्याई बिजयी हुँदा उनका निकटतम प्रतिद्वन्द्वी शंकर श्रेष्ठले २९ मत प्राप्त गरेका छन् । नेपाल पत्रकार महासंघको सर्लाही शाखासहित प्रदेश र केन्द्रिय कार्य समितिका लागि रेडक्रस भवन हरिपुरबाटै जिल्लाका पत्रकारहरुले मत खसालेका थिए । महासंघको जिल्ला शाखामा यसअघि नै सह–सचिवमा जनार्जन खत्री, समावेशी सह–सचिवमा लक्ष्मण राय यादव, जिल्ला सदस्य (खुल्ला) तर्फ अमलेश शर्मा र राधेश्याम कुशवाहा, आदिवासी जनजाति सदस्यमा रीना आले, मधेशी सदस्यमा निरज कुमार यादव, दलित सदस्यमा बुद्धबहादुर विश्वकर्मा (दीपक), महिला सदस्यमा मनिषा कुमारी कुशवाहा र अन्य समावेशी सदस्यमा बच्चेलाल पण्डित निर्वाचित भएका थिए । केन्द्रीय परिषद् सदस्य महिलामा पुस्तिका केसी र प्रदेश परिषद् सदस्यमा प्रकाश मैनाली निर्विरोध भएका थिए ।