कार दुर्घटनामा २ नेपालीको मृत्य

८ मंसिर, काठमाडौँ । अमेरिकाको भर्जिनिया च्यान्टिली नजिकै भएको एउटा भयानक कार दुर्घटनामा परी दुई जना नेपालीको ज्यान गएको छ। दुर्घटनामा ज्यान गुमाउने एक जना रुकुम जिल्लाको आठबिसकोट नगर पालिका ७ का सुरेश केसी र बर्दियाका विवेक सुबेदी रहेका छन् ।

शुक्रबार भएको उक्त दुर्घटनामा एक अर्का नेपाली घाइते भएका छन् । घाइते हुनेमा काठमाडौंका मेहुल श्रेष्ठ रहेका छन्। उनको अहिले अस्पतालमा उपचार भैरहेको छ । उनको स्वास्थ्य अवस्था खतरामुक्त रहेको छ। कार चालक ३० वर्षीय नेपाली विजय तामाङ भने सुरक्षित छन् । उनलाई दुई जनाको हत्या अभियोगमा लाउडाउन काउन्टी सेरिफ कार्यालयले मुद्दा चलाउने तयारी गरेको छ ।

एन.आर.एन.ए. भर्जिनियाका अध्यक्ष विशाल कार्कीले परिवारजन र स्थानीय लाउडाउन काउन्टी सेरिफ कार्यालय सँग सम्पर्क गरेर कसरी अघि बढने भन्ने विषयमा छलफल गर्ने बताएका छन् । लाउडाउन काउन्टी पार्क वे र ताल सेडार पार्क वे नजिक दुर्घटना हुने समयमा चालकले अत्याधिक मदिरा सेवन गरेको अमेरीकी प्रहरीको भनाइ छ । अत्यधिक गतिमा चलाइएको उक्त कार नियन्त्रण गुमेपछि सडक बाट बाहिर पुगी रुखहरूमा ठोक्किएको बताइएको छ ।