विदेशीहरूको पक्षपोषण गर्ने यो संविधान खारेज गर्नुपर्छ : प्रभु साह

नेपालको अर्थतन्त्र धराशायी भएको र नेपालीहरूलाई विदेशमा कमाउने र विदेशमा नै आश्रित हुने बनाइएको भन्दै उनले आक्रोश पोखे । पूर्वमन्त्री साहले अहिलेको संविधान स्वरूपमा खिचडी चरित्रको भएको दाबी गरे । उनले भने,‘अहिलेको संविधानको प्रवृत्ति र चरित्र लुटकारी छ । यो संविधानले नेपाली जनताको पक्षपोषण गर्दैन, यसले नेपाली जनताको होइन, विदेशीहरूको पक्षपोषण गरेको छ । यहाँ विदेशी इन्ट्रेस्टमा काम हुन्छ । प्रभु साह पूर्वाग्रहमा बोलिरहेको छैन । म कुनै आग्रह वा पूर्वाग्रहdf हिँड्ने मान्छे पनि होइन । यो संविधान र व्यवस्थाको लागि मैले ठूला ठूला लडाइँ लडेको छु ।’ नेपालको बदलावको लागि नेपाली जनताले विभिन्न आन्दोलन र जनयुद्धमार्फत ठुलो त्याग र बलिदानी दिएको उनले स्मरण गराए ।  उनले नेपालमा अहिले लोकतन्त्रको ठाउँमा दलतन्त्र हाबी भएको टिप्पणी गरे ।उनले भने,‘मैले यो कुरा आज भनेको होइन, आजभन्दा १० वर्षअघि नै भनेको थिएँ । नेपालमा अब लोकतन्त्र रहेन, यो त दलतन्त्र भयो भनेर भनेको थिएँ । लोकतन्त्रमा निर्वाचित संस्थाको सुप्रिमेसी हुन्छ । नेपालमा जनताबाट निर्वाचित जनप्रतिनिधिहरू डोमिनेट छन् । हिजो पञ्चायतकालमा जसरी जनप्रतिनिधिहरू राजाबाट डोमिनेट थिए, अहिले दलबाट डोमिनेट छन् । मैले यो संसद्लाई मैले लोकतन्त्रको मन्दिर भनेको छैन, यो त दलहरुको कारिन्दाको समारोह भनेको छु ।’उनले नेपालमा निर्वाचन प्रणालीको विकृतिको कुरा उल्लेख गर्ने क्रममा समानुपातिक मतबाट को सांसद बन्छ भन्ने कुरा मत हालेका जनतालाई थाहा नहुनु जनताप्रति गद्दारी भएको दाबी गरे । यस्तै, संघीयतालाई पनि पहिचान र अधिकारविहीन बनाइएको उनको आरोप छ । उनले भारत र चीनजस्तो भीमकायी जनसंख्या भएका देशमा जम्मा ३७ र ३४ वटा सरकारमात्रै रहेको तर नेपालजस्तो तीन करोड जनसंख्या भएको देशमा ७६१ वटा सरकार बनाइएको भन्दै आक्रोश पोखे । उनले संघीय शासन भएका कुनैपनि देशमा तीन तहका सरकार नभएको तथ्याङ्क पेस गरे । उनले नेपालमा भने तीन टायरको सरकार बनाइएको भन्दै आलोचना गरे ।  उनले नेपालमा शासक वर्गलाई नै आरक्षण दिएको भन्दै आलोचना गरे । उनले अहिले दलतन्त्र र दलका नेताहरू मालामाल भएको र जनता लाचार हुनुपरेको अवस्था रहेको सुनाए । उनले जनताको शासन ल्याउनुपर्ने आवश्यकत्ता औँल्याए । उनले पुरानै दलमा सवार भएर देश र जनताको लागि राम्रो गर्न नसक्ने निश्कर्ष निकालेर आफूले नयाँ दल खोलेर जनताको सेवामा समर्पित भएको बताए ।  जनयुद्ध र जनआन्दोलनमा आफूहरूले ठुलो त्याग गरेको भएपनि त्यसमा ठुलो व्यापार र गद्दारी भएको उनको आरोप छ ।