उपाधिका लागि नेपाली युवा टोलीले युएईसँग प्रतिस्पर्धा गर्ने
सारांश
- एसीसी मेन्स यू-१९ प्रिमियर कपको उपाधिका लागि नेपाली युवा टोलीले घरेलु टोली युएईसँग खेल्ने भएको छ।
- फाइनलमा पुगेसँगै नेपाल र युएईले यू–१९ एसिया कपमा स्थान पक्का गरेका छन्।
- प्रिमियर कपबाट तीन टोलीले एसिया कपमा स्थान बनाउनेछन्।
१३ मंसिर, काठमाडौं ।
एसीसी मेन्स यू-१९ प्रिमियर कपको उपाधिका लागि नेपाली युवा टोलीले घरेलु टोली युएईसँग खेल्ने भएको छ। फाइनलमा पुगेसँगै नेपाल र युएईले यू–१९ एसिया कपमा स्थान पक्का गरेका छन्। प्रिमियर कपबाट तीन टोलीले एसिया कपमा स्थान बनाउनेछन्। नेपाल र युएईसँगै तेस्रो स्थानमा रहने टोलीले एसिया कप खेल्नेछ। शनिबार भएको सेमिफाइनलमा युएईले ओमनलाई आठ विकेटले पराजित गर्दै नेपालसँगको भेट पक्का गरेको हो।
ओमानले दिएको एक सय २७ रनको लक्ष्य युएईले २०.१ ओभरमा दुई विकेटको क्षतिमा पूरा गरेको छ। युएईका लागि ओपनर तथा कप्तान याययिन राईले सर्वाधिक ७१ रनको योगदान दिए। अर्का ओपनर आयान मिसबह १९ रनमा आउट भए। मुहम्मद रायान खान २० र पृथ्वी मधु १४ रनमा अविजित रहे। त्यसअघि ब्याटिङ गरेको ओमन ३७.३ ओभरमा एक सय २६ रन बनाउँदा अलआउट भयो।
आजै भएको सेमिफाइनल खेलमा नेपालले मलेसियालाई नौ विकेटले पराजित गर्दै नेपाल उपाधि नजिक पुगेको थियो। मलेसियाले दिएको ५२ रनको झिनो लक्ष्य नेपालले ७.५ ओभरमा एक विकेटको क्षतिमा भेट्टायो। त्यसअघि युएईको अजमानस्थित सेभेन डिस्ट्रिक ग्राउन्ड–२ मा पहिले ब्याटिङ गरेको मलेसिया १७.२ ओभरमा ५१ रनमा समेटिएको थियो। अब तेस्रो स्थानका लागि ओमन र मलेसिया भिड्नेछन्। यो खेलको विजेताले पनि एसिया कपमा स्थान बनाउनेछ। फाइनल तथा र स्थानको खेल सोमबार हुनेछ।
सम्बन्धित खबर
प्रतिक्रिया