जलिरहेको अदालतसँग न्यायको आश, दर्ता भयो रिट
सारांश
- जेनजी युवा समूहको नाममा अराजक समूहले उच्च अदालत विराटनगरमा लगाएको आगो शुक्रबार दिउँसोसम्म निभेको थिएन ।
- जलिरहेको अदालतमा शुक्रबार न्यायको आशसहित बन्दी प्रत्यक्षीकरणको रिट दर्ता भएको छ ।
- अराजक समूहले लगाएको आगोका कारण धुवाँ र खरानीले भरिएको अदालतमा भारतीय नागरिक ३७ वर्षीय शेर महम्मदको तर्फबाट रिट दर्ता भएको हो ।
२८ भदाै, विराटनगर ।
जेनजी युवा समूहको नाममा अराजक समूहले उच्च अदालत विराटनगरमा लगाएको आगो शुक्रबार दिउँसोसम्म निभेको थिएन । जलिरहेको अदालतमा शुक्रबार न्यायको आशसहित बन्दी प्रत्यक्षीकरणको रिट दर्ता भएको छ । अराजक समूहले लगाएको आगोका कारण धुवाँ र खरानीले भरिएको अदालतमा भारतीय नागरिक ३७ वर्षीय शेर महम्मदको तर्फबाट रिट दर्ता भएको हो । उनी गत साउन १ गते लागुऔषध ब्राउन सुगरसहित पक्राउ परेका थिए । उनीविरुद्ध ४ पटक म्याद थप भइसकेको छ । अनुसन्धान जारी रहेका बेला अदालतमा आगजनी भएका कारण प्रहरीले उनीविरुद्ध म्याद थप गरेको थिएन ।
गैरकानुनी रुपमा थुनामा राखेको भन्दै सञ्जीवकुमार साहले उच्च अदालत विराटनगरमा बन्दी प्रत्यक्षीकरणको रिट दर्ता गरेका हुन् । रिटको सुनुवाइका लागि आइतबारका लागि पेसी तोकिएको अदालतका रजिष्ट्रार जगदीशप्रसाद भट्टले बताए । उनका अनुसार रिट दर्ता हुँदा अदालत जलिरहेको थियो । जलेर खण्डहर भएको अदालतमा रिट दर्ता हुनुले कानुनी अधिकारको बाटो खुला रहेको सन्देश दिएको उच्च अदालत विराटनगर बार एसोसिएसनका सचिव अधिवक्ता विनोदकुमार तिमल्सिनाले बताए । जलिरहेको अदालतमा रिट दर्ता हुनु र सुनुवाइका लागि पेसी तोकिनुले संरचना जलेपनि कानुनी उपचारको बाटो खुला रहेको सन्देश दिएको उनले बताए ।
खण्डहर भयो अदालत
भट्टका अनुसार उच्च अदालत विराटनगर खण्डहर भएको छ । अदालतको भुइँ तालामा रहेका कार्यालयकाे कक्ष र फाँट जलेर नष्ट भएका छन् ।अभिलेख शाखामा रहेका सबै मिसिल र कागजात जलेको छ । बचेका केही कागजात पनि काम लाग्ने अवस्थामा छैनन । थोरै मात्र मिसिल काम लाग्ने अवस्थामा छन् । अराजक समूहले अदालत परिसरमा पार्किङ गरिएका ११ वटा चार पांग्रे सवारी जलाएका छन् । जलेको मोटरसाइकलको संख्या यकिन भइसकेको छैन । आगजनीको क्रममा ३–४ वटा मोटरसाइकल चोरी भएको थियो । उनका अनुसार अदालतमा नजलेका सामग्री चाेरी भएकाे थियाे । उनका अनुसार अदालतकाे सरसफाइ र क्षतिकाे विवरण संकलन भइरहेकाे छ । अभिलेख शाखामा रहेकाे ६५ हजार बढी मुद्दाकाे मिसिल जलेकाे उनले बताए । अदालतमा हाल १ हजार हाराहारी मुद्दाकाे मिसिल मात्रै बाँकी छ । मिसिलकाे यकिन विवरण आइतबार थाहा हुने भट्टले बताए । आगजनीका कारण जिल्ला अदालत माेरङ पनि खण्डहर भएकाे छ । दशैं-तिहार अघि जिल्ला अदालतले सेवा प्रवाह गर्न सक्ने अवस्था छैन ।
प्रतिक्रिया