आचरण विपरीतको काम गरेको आरोप लगाएर एसपी सिलवालबिरुद्ध मधेस प्रदेश प्रहरी कार्यालय र प्रहरी प्रधान कार्यालयमा ३५ थान उजुरी परेको छ । ती उजुरी ५ वटा भिन्नाभिन्दै प्रकृत्तिको रहेको डीआईजी चतुर्वेदीले बताए । उनले भने, ‘३५ थान उजुरी आएको छ, त्यसबारे समितिले छानबिन गरिरहेको छ ।’ ट्राफिक प्रहरीले गर्नुपर्ने भन्दा फरक काम गरेको भन्नेबारे मधेस प्रदेशका ८ वटै जिल्लाबाट आएको उजुरी सङ्कलन गरेर अध्ययन भइरहेको मधेस प्रदेश प्रहरी कार्यालयका एकजना अधिकृतले बताए । उनले भने, ‘३५ थान उजुरी पथलैयाका एसपीविरुद्धको मात्र होइन, उहाँका मातहतका सबै जिल्लाको उजुरी सङ्कलन गरिएको हो ।’

प्रहरी उपरीक्षक सिलवालले मापसे गरेर सवारी चलाउने चालकलाई जरिवाना गरेर छाड्नुपर्नेमा रातभर नियन्त्रणमा राखेको र चालकहरूसँग रकम असुल्ने गरेको आरोप छ । त्यस्तै उनले चोरीको गाडी नियन्त्रणमा लिएर भन्सार बुझाउनुपर्नेमा आफूखुसी प्रयोग गरेको आरोप छ । छानबिन समितिसँग सिलवालले चोरीको गाडी भन्सार बुझाउने प्रक्रियामा नै रहेको बयान दिएका छन् ।

छानबिन समितिका एकजना सदस्य भन्छन्, ‘उहाँले चोरीको गाडी भन्सार बुझाउने प्रक्रियामा छु भन्नुभएको छ ।’ राजमार्गमा चेकजाँच गर्दा स्थानीय प्रहरीसँग समन्वय गरेर संयुक्त चेकजाँच गर्नुपर्नेमा ट्राफिकले मात्रै गर्ने गरेको आरोप छ । त्यस्तै, हेभिलोडको नियम पालना नगराएको बारे समितिले उनीमाथि छानबिन गरिरहेको छ ।

छानबिन समितिका संयोजक तथा मधेस प्रदेश प्रहरी कार्यालयका एसएसपी कमल थापा आफैँ विवादित हुन् । भैंसेपाटीमा घरजग्गा कारोबारीलाई हनिट्रयापमा पारेर रकम असुलेको घटनामा थापा पनि मतियार रहेको आरोप लागेको थियो ।

व्यवसायीलाई ‘बलात्कार मुद्दामा पसाउँछौँ’ भन्दै हनिट्रयापमा पारेर ३० लाख असुलेको घटनामा शक्तिकेन्द्रबाट दबाब दिन लगाएर थाप आफू कारबाहीबाट जोगिएका थिए । सो प्रकरणमा त्यतिबेला भैसेपाटीमा कार्यरत इन्स्पेक्टर बिनु शाही ललितपुर जिल्ला अदालतबाट धरौटीमा छुटेकी छन् ।