६ साउन, काठमाडौं । 

पोखरामा एक नवजात शिशुको हत्या गरी राजमार्ग छेउमा फालेको अभियोगमा प्रहरीले शिशुका बाबुलाई पक्राउ गरेको छ। घटनाको गत वर्ष असोज १३ गतेको हो। शिशुको हत्यापछि उनी लुकीछिपी बस्दै आएका थिए। आइतबार अर्कै सन्तानकी सुत्केरी श्रीमतीलाई उपचारका लागि अस्पताल ल्याएका बेला उनी प्रहरीको फन्दामा परेका हुन्।

जिल्ला प्रहरी कार्यालय, कास्कीका अनुसार, गत वर्ष असोज १३ गते पोखरा महानगरपालिका–१४, चाउथेस्थित पृथ्वी राजमार्गको छेउमा जेब्रा झोलामा रातो-गुलाबी रङको ब्लाङ्केटले बेरिएको अवस्थामा नवजात शिशुको शव फेला परेको थियो। शवको पोस्टमार्टम गर्दा शिशुको मृत्यु घाँटी र टाउकोमा लागेको चोटका कारण मृत्यु भएको रिपोर्ट आएपछि प्रहरीले कर्तव्य ज्यान मुद्दामा अनुसन्धान केन्द्रित गरेको थियो। अनुसन्धानका क्रममा प्रहरीले शिशुका बुवा नुवाकोट घर भई हाल पोखरा बस्दै आएका ३७ वर्षीय गोविन्द लामिछाने भएको पहिचान गरे पनि उनी फरार थिए।

घटनाको झन्डै दश महिनापछि, आइतबार लामिछानेले अर्कै सन्तानकी सुत्केरी श्रीमतीलाई उपचारका लागि पोखरा स्वास्थ्य विज्ञान प्रतिष्ठान ल्याएका थिए। सोही सूचनाको आधारमा प्रहरीले उनलाई अस्पताल परिसरबाटै पक्राउ गर्न सफल भयो। पक्राउ परेका लामिछानेलाई जिल्ला अदालत, कास्कीबाट कर्तव्य ज्यान सम्बन्धी कसुरमा अनुसन्धानका लागि ७ दिनको म्याद थप गरिएको छ। घटनामा अन्य व्यक्तिको संलग्नता र हत्याको कारणबारे थप अनुसन्धान भइरहेको कास्की प्रहरीका सूचना अधिकारी, प्रहरी नायब उपरीक्षक हरि बहादुर बस्नेतले जानकारी दिए।