कैलालीमा चितुवाको छालासहित एक युवक पक्राउ
२९ माघ, नगढी । कैलालीमा चितुवाको छालासहित एकजना युवक पक्राउ परेका छन् । पक्राउ पर्नेमा डोटीको बोगटान गाउँपालिका-३ मेल्टा बस्ने २६ वर्षीय नरेश साउँद रहेको जिल्ला प्रहरी कार्यालयका प्रवक्ता प्रहरी नायब उपरीक्षक(डीएसपी) कबिन्द्रसिंह बोहराले जानकारी दिए । उनकाअनुसार साउँदलाई सोमबार दिउँसो सुदूरपश्चिम प्रदेश प्रहरी कार्यालय धनगढीका प्रहरी वरिष्ठ नायव निरीक्षक बासुदेव अवस्थी नेतृत्वको टोलीले विशेष सूचनाका आधारमा पक्राउ गरेको हो ।
अवस्थीको कमाण्डमा खटि गएको प्रहरी टोलीले धनगढी उप-महानगरपालिका वडा नं. ०४ बसपार्कस्थित वर्ष ४३ को देवसिंह बोहराले संचालन गरेको मिलनसार गेष्ट हाउसबाट नियन्त्रणमा लिएको हो । खानतलासी गर्दा नरेशको झोलामा ८ फिट २ इन्च लम्बाइ र २ फिट २ इन्च चौडाइ भएको एक थान चितुवाको छाला बरामद भएको प्रहरीले जनाएको छ । पक्राउ परेका नरेशलाई थप अनुसन्धानको लागि डिभिजन वन कार्यालय धनगढी पठाइएको डीएसपी बोहराले जानकारी दिए ।
Post Comment