विदेशमा बसेर फेसबुक ह्याक गरी ब्ल्याकमेल गर्ने नेपाल फर्केपछि पक्राउ

२१ साउन, काठमाडौँ । विदेशमा बसेर महिलाको फेसबुक ह्याक गरी ब्ल्याकमेलिङ गरेको आरोपमा प्रहरीले एक जनालाई पक्राउ परेको छ ।

पक्राउ पर्नेमा तनहुँको घिरिङ गाउँपालिका वडा नम्बर १ स्थायी घर भएका ३५ वर्षीय सन्दीप थापा मगर रहेका छन् । वैदेशिक रोजगारीको सिलसिलामा रोमानियामा रहेका मगरले पीडित महिलाको फेसबुक ह्याक गरी उक्त म्यासेन्जरमा पीडित र पीडितको श्रीमान् बिच भएका कुराकानी लगायतका गतिविधि सङ्कलन तथा सेभ गरेका थिए । त्यसपछि फेक अकाउन्ट बनाई उक्त अकाउन्टबाट पीडितका आफन्तलाई पठाएर ब्ल्याकमेल गरी मानसिक तनाव, दुःख हैरानी दिने गरेका थिए ।

समाजमा बदनाम बेइज्जत गरी चरित्र हत्या हुने कार्य गरेको सम्बन्धमा पीडित महिलाले साइबर ब्युरोमा निवेदन दिएकी थिइन् । ब्युरोले प्राविधिक अनुसन्धान र विश्लेषण पश्चात् उक्त कार्य मगरले गरेको  खुलेको प्रहरी उपरीक्षक दीपक राज अवस्थीले जानकारी दिए ।  मगर स्वदेश (नेपाल) फर्कने क्रममा आइतबार  त्रिभुवन अन्तर्राष्ट्रिय विमानस्थल गौचरको सहकार्यमा ब्युरोको टोलीले पक्राउ गर्न सफल भएको थियो ।

उपरीक्षक अवस्थीका अनुसार उनलाई अदालती कारबाहीका लागि जिल्ला अदालत काठमाडौँमा उपस्थित गराइएको छ । उनीमाथि विद्युतीय (इलेकट्रोनिक) कारोबार ऐन, २०६३ अन्तर्गतको कसुरमा मुद्दा दर्ता गरी प्रहरी अनुसन्धान पश्चात् सजायको मागदाबीसहित अदालतमा मिसिल पेस भइसकेको प्रहरीको भनाई छ ।