टावरमा युवती चढेपछि सर्लाहीका आधा दर्जनबढी पालिकामा विद्युत् अवरुद्ध

२९ असोज, सर्लाही । सर्लाहीको कविलासी नगरपालिका–२ पिपरियास्थित नवलपुर–चैनपुरा १३२ केभी प्रसारण लाइनको ४५ नम्बर टावरमा एक युवती चढेपछि जिल्लाका आधा दर्जनभन्दा बढी स्थानीय तहमा विद्युत् सेवा अवरुद्ध भएको छ।

प्रसारण लाइनका प्रशासन प्रमुख कुनाल चौधरीका अनुसार ती युवती बिहीबार साँझ करिब साढे ४ बजे टावरमा चढेकी हुन्। उनी कविलासी नगरपालिका–७ सिरसियाकी १७ वर्षीया युवती रहेको बताइएको छ।

प्रत्यक्षदर्शीका अनुसार युवतीले टावर चढ्नुअघि चप्पल तलै खोलेकी थिइन्। उनले आफ्ना कपडा टावरमा झुन्ड्याएर नाङ्गै टावरको माथिल्लो भागमा बसेकी छन्।
स्थानीयका अनुसार युवतीको मानसिक अवस्था ठीक नरहेको बताइएको छ।

टावरमा युवती चढेपछि सम्भावित दुर्घटना रोक्न विद्युत् सेवा अवरुद्ध गरिएको बताइएको छ। उनलाई सुरक्षित रूपमा उद्धार गर्न नेपाल प्रहरीको टोली घटनास्थलमा खटिएको छ।

जिल्ला प्रहरी कार्यालय सर्लाहीका प्रवक्ता एवं डीएसपी वेदप्रसाद गौतमले युवतीको उद्धारका लागि प्रहरी टोली परिचालन गरिएको र उद्धारको प्रयास जारी रहेको जानकारी दिए।

विद्युत् सेवा अवरुद्ध हुँदा प्रभावित क्षेत्रका उपभोक्ता समस्यामा परेका छन्।