विश्व शान्तिका लागि लुम्बिनीसम्म ‘महान् धम्म यात्रा’ हुँदै

२६ माघ, लुम्बिनी ।

विश्वभर शान्ति, अहिंसा र मानव एकताको सन्देश फैलाउने पवित्र उद्देश्यका साथ थाइल्याण्डका भिक्षुहरूको नेतृत्वमा भगवान् बुद्धको जन्मस्थल लुम्बिनीसम्मको ‘महान् धम्म यात्रा’ सुरु हुन लागेको छ ।‘शान्तिको लागि धम्म यात्रा—भगवान् बुद्धको जन्मस्थल लुम्बिनीसम्म’ भन्ने मूल नाराका साथ आयोजना हुन लागेको यस अभियानको मुख्य लक्ष्य विश्वमा बढ्दै गएको द्वन्द्वका बीच बुद्धको शान्ति र करुणाको शिक्षालाई पुनर्जीवित गर्नु हो । यो यात्रा थाइल्याण्डको वाट थम्पायल बिहारका प्रमुख भिक्षु आचान सुफित भन्तेको नेतृत्वमा सञ्चालन हुनेछ ।ऐतिहासिक यात्रामा थाइल्याण्डका २२ जना भिक्षुहरूसहित लाओस्, भारत र नेपालका गरी कूल २८ जना भिक्षु तथा उपासकहरू सहभागी हुनेछन् ।

नेपालमा यो पदयात्रा माघ २७ गते रौतहटको चन्द्रपुर नगरपालिका–१ स्थित गोल्माराजा बुद्ध बिहारबाट विधिवत् रूपमा सुरु हुनेछ । चन्द्रपुरबाट सुरु हुने यो पैदल यात्रा विभिन्न जिल्लाहरू पार गर्दै फागुनको दोस्रो साता लुम्बिनी पुग्ने कार्यतालिका छ ।आयोजक समितिले हालै पत्रकार सम्मेलन गरी यात्राको विस्तृत मार्गचित्र (रुट) र सुरक्षा एवं व्यवस्थापनका पाटोहरूबारे जानकारी गराएको छ ।गोल्माराजा बुद्ध बिहारका भन्ते मेधकर स्थविरका अनुसार, यो यात्रा केवल धार्मिक भ्रमण मात्र नभई नेपालको धार्मिक पर्यटन प्रवद्र्धन र विश्व शान्तिको साझा अभियान पनि हो । यात्राले बुद्धको जन्मस्थल नेपाललाई विश्वमा थप परिचित गराउने र बौद्ध धर्मावलम्बीहरूका बीचमा आपसी भाइचारा बढाउने विश्वास गरिएको छ । आयोजकले यस अभियानमा स्थानीय समुदाय, नागरिक समाज र शान्तिप्रेमी सबैलाई सक्रिय सहभागिता र सहयोगका लागि अपिल गरेको छ ।