सर्लाहीमा निर्वाचन अधिकृतको कार्यालय स्थापना

सर्लाही, ०२ माघ । अमलेश शर्मा
आगामी फागुन २१ गते हुने प्रतिनिधिसभा निर्वाचनको तयारीस्वरूप सर्लाहीमा शुक्रवार निर्वाचन अधिकृतको कार्यालय स्थापना गरिएको छ । चार निर्वाचन क्षेत्र रहेको सर्लाही जिल्लामध्ये क्षेत्र नम्बर २ का लागि सदरमुकाम मलंगवा स्थित जिल्ला समन्वयको कार्यालयमा मुख्य निर्वाचन अधिकृतको कार्यालय स्थापना गरिएको छ ।

त्यसैगरी, क्षेत्र नम्बर १ का लागि लालबन्दी नगरपालिका वडा नं. १० को वडा कार्यालयमा निर्वाचन अधिकृतको कार्यालय स्थापना गरिएको छ। यस्तै, क्षेत्र नम्बर ३ का लागि हरिवन स्थित मालपोत कार्यालयमा र ४ नम्बर क्षेत्रका लागि श्री बेनी भोला नमूना मा. वि. गोडैतामा निर्वाचन अधिकृतको कार्यालय स्थापना गरिएको निर्वाचन कार्यालय सर्लाहीका प्रमुख ऋषि राम पौडेलले जानकारी दिनुभयो।

निर्वाचनलाई व्यवस्थित, निष्पक्ष र प्रभावकारी बनाउन आवश्यक सबै तयारी अघि बढाइएको जनाइएको छ । क्षेत्रनम्बर २ मा जिल्ला न्यायधिश पुष्पराज थपलिया सर्लाही जिल्लाको मुख्य निर्बाचन अधिकृत, क्षेत्रनम्बर १ मा ईजलास अधिकृत टिका बहादुर थापा निर्बाचन अधिकृत, क्षेत्रनम्बर ३ मा संस्कृति, पर्यटन तथा नागरिक उड्डयन मन्त्रालयका उपसचिव नवराज आचार्य निर्बाचन अधिकृत र क्षेत्रनम्बर ४ मा सर्वोच्च अदालतका इजलास अधिकृत विनोद प्रसाद घिमिरे निर्बाचन अधिकृतको रुपमा खटिसकेका छन् ।