सर्लाही।

तराई–मधेशमा ‘बजरंगी भाइजान’ को नामले चिनिने समाजिक अभियन्ता सरोज रायको अग्रसरता र सक्रियतामा सर्लाही जिल्लाका बाढीपीडित विपन्न परिवारहरूलाई आपतकालीन खाद्यान्न सामग्री तथा सुरक्षित पिउने पानीका लागि वाटर फिल्टर वितरण गरिएको छ।

सुरक्षित खानेपानीका लागि फिल्टर वितरण 

रायको पहलमा कविलासी नगरपालिका अन्तर्गत हेमपुर, पछगछीया, रनीया, जमुनिया, विरनगरा र मदनपुर गाउँका करिब ६५० विपन्न परिवारलाई स्वच्छ र सुरक्षित पानी पिउन सक्ने उद्देश्यले वाटर फिल्टर वितरण गरिएको थियो।

अविरल वर्षाले प्रभावित परिवारलाई खाद्यान्न राहत

फिल्टर वितरणको केही समयमै आएको अविरल वर्षाले कविलासी नगरपालिकाका करिब ३०० परिवार प्रत्यक्ष प्रभावित भएपछि भोकै बस्न नपरोस् भन्ने उद्देश्यले आपतकालीन खाद्यान्न राहत वितरण सुरु गरिएको हो।
पछगछीया, जमुनिया र विरनगरा गाउँमा वितरण सम्पन्न भइसकेको छ भने बाँकी गाउँहरूमा पनि राहत पु-याउने कार्य जारी रहेको रायले जानकारी दिएका छन्।

प्रत्येक प्रभावित परिवारलाई २५ के.जी. चामल, २ के.जी. दाल, ५ के.जी. आटा, ५ के.जी. चिउरा, २ पोका भूजा, खाने तेल, नुन लगायतका अत्यावश्यक खाद्यान्न सामग्री वितरण गरिएको छ। यस अभियानलाई सफल बनाउन रायसँगै विभिन्न सहयोगी साथीहरूको साथ–सहयोग रहेको छ। विशेषगरी जेनजी युवाहरूको स्वैच्छिक सहयोग निकै प्रशंसनीय रहेको उल्लेख गरिएको छ।

अब चक्रघट्टा गाउँपालिकामा अभियान

कविलासी नगरपालिकामा राहत वितरण सम्पन्न भएपछि अब चक्रघट्टा गाउँपालिकाका प्रभावित परिवारलाई समेत राहत पुर्‍याउने कार्य अगाडि बढाइने समाजिक अभियन्ता सरोज रायले बताएका छन्।

लामो समयदेखि समाजिक सेवामा सक्रिय सरोज रायले देशका विपत्तिमा उद्धार तथा राहत वितरण गर्दै आएका छन्। साथै, अन्तर्राष्ट्रिय स्तरमा समेत उनले साउदी अरब, बंगलादेश, दुबई, भारत लगायतका विभिन्न देशमा अलपत्र परेका वैदेशिक रोजगारमा गएका नेपालीलाई उद्धार गर्ने, हराएका बालबालिकालाई खोजी गरी परिवारमा जिम्मा लगाउनेजस्ता महत्वपूर्ण कार्यसमेत गर्दै आएका छन्।