५ फागुन,  खोटाङ — आइतबार बेलुकी हलेसी बजारमा भएको आगलागीमा सात करोड बढीको क्षति भएको छ । आगलागीमा घर, होटल, पसललगायत गरी सात करोड ५० लाख बराबरको क्षति भएको हो ।

खोटाङका निमित्त प्रमुख जिल्ला अधिकारी हिराधन राईका अनुसार पदमशेर राईको काठ र जस्ताले बनेको तीन तले घर, पहिलो तलामा राखिएको हार्डवेयर पसल, दोस्रो तलामा भएको निर्धन उत्थान लघुवित्त संस्थाको कार्यालय जलेर नष्ट हुँदा करिब चार करोड रुपैयाँ बराबरको क्षति भएको छ । त्यस्तै ऐराख राईको न्यू–कल्याण होटल, चार तले पक्की घर र घरको पछाडिपट्टी दुई तले काठको घर गरी दुई करोड ५० लाख बराबरको क्षति भएको छ ।

प्रकाशचन्द्र गिरी हलेसी दर्शन होटलको फलामको ट्रष्टले बनेको एक तले भान्छा घर र दुई तले पक्की घरमा आंशिक क्षति हुँदा ३० लाख बराबरको क्षति भएको छ । त्यसैगरी भरणशेर राईको पारुहाङ होटल, चार तले पक्की भवनको दोस्रो र तेस्रो तलामा आंशिक क्षति हुँदा अन्दाजी ५० लाख बराबरको भएको छ । प्रारम्भिक विवरणअनुसार सबैगरी करिब सात करोड बराबरको क्षति भएको निमित्त प्रजिअ राईले बताए ।