१५ माघ, काठमाडौंमा जारी सभापति कप फुटबल प्रतियोगिताको दोस्रो सेमिफाइनलमा आज आयोजक नेपाल लोकतान्त्रिक खेलकुद संघ बागमती प्रदेश र न्युरोड टिम (एनआरटी) प्रतिस्पर्धा गर्दै छन् ।

यी दुई टिमबीचको सेमिफाइनल प्रतिस्पर्धा अपरान्ह साढे ५ बजेदेखि दशरथ रंगशालामा सुरु हुनेछ । जारी प्रतियोगितामा बागमतीमा विकेश कुथु तथा एनआरटीमा अञ्जन विष्ट कप्तान छन् । क्वाटरफाइनलमा बागमतीले विभागीय क्लब नेपाल पुलिसलाई २–१ ले हराएको थियो । एनआरटीले फ्रेन्ड्स क्लबलाई ३–१ ले हराउँदै सेमिफाइनलको यात्रा गरेको थियो । उक्त खेलमा कप्तान अञ्जन विष्टले २ गोल गरे । उनी सेमिफाइनलमा पनि आफ्नो सानदार लय कायम राख्न चाहन्छन् ।

आजको विजेताले बिहीबार उपाधिका लागि संकटा क्लबको सामना गर्नेछ । संकटाले सोमबार पहिलो सेमिफाइनलमा मछिन्द्र क्लबविरुद्ध सडनडेथमा ८–७ को जित निकाल्दै फाइनलको यात्रा गरेको थियो ।  प्रतियोगिताको उपाधि विजेताले नगद २६ लाख तथा उपविजेताले १३ लाख रुपैयाँ पुरस्कार पाउनेछ ।