पुष्पक एक्सप्रेस दुर्घटना : मृतकका परिवारलाई डेढ लाख सहायता

१० माघ, नयाँ दिल्ली । जनवरी २२ मा महाराष्ट्रको जलगाउँमा लखनऊबाट मुम्बई जाँदै गरेको पुष्पक एक्सप्रेसका २३ जना यात्रुलाई अर्को ट्र्याकमा आउँदै गरेको कर्नाटक एक्सप्रेसले किचेको थियो । यस दुर्घटनामा हालसम्म १९ जनाको मृत्यु भइसकेको छ भने अरू १० जना घाइतेको जलगाउँस्थित निजामती अस्पतालमा उपचार भइरहेको बताइएको छ । यस घटनामा चार जना नेपालीको पनि मृत्यु भएको छ ।

शवहरूको सनाखत हुन बाँकी रहेकाले मृतकको संख्या बढ्न सक्ने अनुमान छ । यस घटनामा मर्ने व्यक्तिका परिवारलाई प्रतिव्यक्ति डेढ लाख भारु रुपैयाँ दिने रेलमन्त्री अश्विनी वैष्णवले घोषणा गरेका छन् । घटनाका गम्भीर घाइतेलाई प्रतिव्यक्ति ५० हजार रुपैयाँ क्षतिपूर्ति दिने भनिएको छ । सामान्य घाइतेले पनि ५ हजार रुपैयाँ क्षतिपूर्ति पाउने घोषणा वैष्णवले गरेका छन् । घटना भएको ठाउँमा ‘शार्प टर्न’ भएकोले गर्दा अर्को ट्रयाकमा हाम फालेका यात्रुहरूले रेल आएको थाहा पाउन नसकेको मध्य रेलवेको भुसावल डिभिजनका आधिकारिक स्रोतहरूले बताएका छन् । घटनाको समयमा रेलमा उपस्थित मानिसहरूले आगलागीको हल्ला पहिले एक चिया विक्रेताले फैलाएको बताएका छन् ।