सर्लाहीमा सर्प दंशबाट ३ वर्षीय बालकको मृ*त्यु

१४ जेठ, सर्लाही ।         

सर्लाहीको कौडेना गाउँपालिका–१ लक्ष्मीपुरमा सर्पदंशबाट ३ वर्षीय बालकको मृत्यु भएको छ। बालकको मृत्युपछि आफन्तजनले चिकित्सकको लापरबाही भएको आरोप लगाउँदै अस्पतालमा विरोध जनाएका छन्। जिल्ला प्रहरी कार्यालय सर्लाहीका अनुसार स्थानीय रवीन्द्र गिरीका छोरा आदित्य गिरीलाई बुधबार साँझ करिब ६:३० बजे घरको कौसीमा खेलिरहेका बेला सर्पले टोकेको थियो। सर्पदंशबाट घाइते भएका बालकलाई उपचारका लागि तत्काल प्रादेशिक अस्पताल मलंगवा लगिएको प्रहरीले जनाएको छ।

अस्पतालमा उपचारकै क्रममा साँझ ७:५० बजे चिकित्सकले बालकलाई मृत घोषणा गरेका थिए। त्यसपछि आक्रोशित आफन्तजनले चिकित्सकको लापरबाहीका कारण बालकको मृत्यु भएको आरोप लगाउँदै अस्पताल परिसरमा होहल्ला गरेका थिए। स्थिति नियन्त्रणमा लिन जिल्ला प्रहरी कार्यालयबाट प्रहरी निरीक्षक रुपेश अधिकारीको नेतृत्वमा २५ जनाको प्रहरी टोली परिचालन गरिएको थियो। प्रहरीले सम्झाइबुझाइ गरेपछि अवस्था सामान्य बनेको जनाएको छ। प्रहरीका अनुसार राति करिब ९:५० बजे कानुनी प्रक्रिया पूरा गरी मृतक बालकको शव उनका बुबाले बुझेका छन्।