१५ मंसिर, काठमाडौं ।
जेन–जी आन्दोलनताका गृहसचिव रहेका गोकर्णमणि दुवाडीले भदौ २३ गते सुरक्षाकर्मीहरूले आत्मरक्षाका लागि गोली चलाएको र त्यसक्रममा हताहती भएको दावी गरेका छन् । उनी ७ मंसिरबाट अनिवार्य अवकाशमा गएका छन् ।
आफूलाई पक्राउ गरी कारबाही गर्नुपर्ने दावी सहित दायर रिट निवेदनमाथिको जवाफ दिँदै तत्कालीन सचिव दुवाडीले सुरक्षाकर्मीहरूले आत्मरक्षा र हातहतियारको रक्षाका लागि गोली चलेको दावी गरेका हुन् । शान्ति सुरक्षा कायम गर्न सुरक्षाकर्मीले कानून बमोजिम आत्मरक्षा, हातहतियारको रक्षा गर्न सुरक्षा उपाय अपनाउनैपर्ने हुन्छ,’ लिखित जवाफमा दुवाडीले भनेका छन्, ‘उक्त मितिमा सुरक्षा सम्बेदनशीलताको आधारमा आत्मरक्षा, हातहियार रक्षा तथा सार्वजनिक सम्पत्तिको रक्षा र संरक्षण गर्नुपर्ने अवस्था आएको अवस्था र परिस्थितिले देखाउँछ ।’
जेन–जी आन्दोलनपछि गठन भएको सरकारले दुवाडीलाई गृह मन्त्रालयबाट राष्ट्रिय योजना आयोगको सचिवालयमा सरुवा गरेको थियो । सचिवहरूमध्ये उनी पहिलो वरीयतामा रहे पनि मुख्यसचिव नभई अवकाश भएका थिए । गौरीबहादुर कार्की नेतृत्वको जाँचबुझ आयोगले उनलाई शुरुमा काठमाडौं उपत्यकाबाहिर जान बन्देज लगाएपनि पछि भने फुकुवा गरेको थियो ।
प्रतिक्रिया