धरानमा एमाले उमेदवारबीच कुटाकुट, उपचार गराउँदै छन् घाइते

१२ मंसिर, विराटनगर ।

नेकपा (एमाले) सुनसरी क्षेत्र नम्बर–१ मा महाधिवेशन प्रतिनिधि मनोनयन दर्ता गराउने क्रममा उमेदवारबीच कुटाकुट भएको छ । कोसी प्रदेशका पूर्वमुख्यमन्त्री भीम आचार्यका निजी सचिव तथा एमाले सुनसरी जिल्ला कमिटी सदस्य अनिल राजधामीमाथि पार्टीकै अर्को समूहले कुटपिट गरेको हो ।कुटपिटबाट घाइते भएका राजधामीले अनुहारमा चोट लागेको र आफू यति बेला धरानस्थित बीपी कोइराला स्वास्थ्य विज्ञान प्रतिष्ठानमा उपचाररत रहेको बताए ।

‘‘मेरो अनुहार सुन्निएको छ, चिकित्सकले ग्लान्ड्समा पनि चोट लागेको भन्नुभएको छ । भिडियो एक्सरेपछि सीटीस्क्यान गर्ने तयारीमा छु,” उनले भने, “म अहिले बीपी कोइराला स्वास्थ्य विज्ञान प्रतिष्ठानमा छु ।’’ धरानस्थित एमाले पार्टी कार्यालयनजिकै बिहीबार (मंसिर ११) बेलुका युवा संघ कोसी इन्चार्ज दिवस राई, धरान उपमहानगरपालिका–१० का वडाध्यक्ष विवेक राईसहितको समूहले आफूलाई कुटपिट गरी गम्भीर घाइते बनाएको राजधामीले बताए । उनलाई तत्कालै विजयपुर अस्पताल लगेर उपचार गरिएको थियो । शुक्रबार (मंसिर १२) थप चेकजाँचका निम्ति बीपी प्रतिष्ठान पुगेको उनले सुनाए  ।

युवा कोटामा मनोनयनपत्र दर्ता गराएपछि फिर्ता लिन भन्दै दबाब दिइएको र नलिने अडान लिएका कारण आक्रमण गरिएको उनको भनाइ छ । राजधामी र दिवस दुवैले महाधिवेशनमा युवातर्फका प्रतिनिधिका निम्ति मनोनयनपत्र दर्ता गराएका थिए । एमाले धरान उपमहानगरका सचिव योगेशबाबु काफ्लेले मनोनयन दर्ताका क्रममा विवाद भएको र दुवै पक्षले मिलापत्र गरिसकेको बताए । उनले भने, ‘‘उहाँहरूले मिलापत्र गरिसक्नुभएको छ ।’’